陳奕迅（Eason）早前完成紅館27場跨年演唱會後，飛到北海道放假1個月，返港後推出新歌《塵大師》，他坦言在冰天雪地中，修煉了修理吸塵機的學問，在大自然中休息，是為放鬆自己心中緊扣的結，然後收拾心情，為世界巡迴出發作準備。
新歌由2020年開始籌劃，Eason原來花了3年時間製作，「一直慢慢做，做了3年，從來未試過可以慢慢咁做歌，最初有啲唔慣，以前一年出三隻碟，兩隻廣東一隻國語。四大天王仲癲，一年三隻碟拍10部戲。當大家可以慢一啲，又可以投入多啲落去，出嚟嘅內容可以再深層次，其實係好開心。」由收到林家謙的曲後，Eason十分喜歡，想起多年來都很欣賞林海峰（Jan）的詞，就邀阿Jan為他填詞，再邀請李榮浩編曲，收到李榮浩編曲時，他正在隔離中，第一次聽到此歌時，成個人震晒，淚水不自覺流出來，他說：「可能我對音樂特別敏感啦，結他聲鼓聲都太動聽，我覺得同首歌意境好夾，歌詞叫你做人要冷靜再入定，但結他像人世間上的各種執念、撩住、拮住你嗰個想入定嘅心，令個人好興奮，真係好正。編曲有了之後，阿Jan個人一啲都唔『係咁咦」囉，好認真，歌詞、段落上下，都為配合編曲調及改幾次，本來首歌冇達哥（吳孟達），因為做緊嗰陣達哥過身，Jan即刻又加番，作為一種默默致敬，又畫埋個塵大師公仔俾我，等我可以出埋動畫版MV，真係好正，好多謝佢。」
談到近年Eason似乎淚水忽然多了，演唱會上第一次在台上喊，聽李榮浩編曲又落淚，他剖白未知是否年紀大了，心開始變得柔軟，他說：「我係一個好抑壓的人，以前乜都死撐，覺得咩呀，梗係輸人唔輸陣，所以咪只得黑面，或者嘻嘻哈哈俾人睇，而家人大咗，開始好易就被感動到。歌叫《塵大師》，我做唔到大師啦 ，我都係人，大咩師，我只係一粒塵，好渺小。我有時都會諗，塵歸塵、土歸土，有一日我都會返去化為塵，所以做人唔好睇到自己咁大，否則會變好『㒼塞』，我哋其實好渺小，一個大風吹埋嚟，可以咩都冇晒。我睇到一啲朋友聽歌後留言，都話今日好唔掂就爆血管，聽完首歌鬆一鬆，我就好開心，林海峰填呢首詞，都係想送俾香港人啦，希望大家一齊可以度過所有緊張日子，放鬆一下心情。」
Eason透露會在4月開始巡迴演唱會，先去新加坡、馬來西亞，7月會去台北小巨蛋，除了以上三個地方，他還笑言：「其實諗到嘅地方，有機會都想去，美加、澳紐、歐洲，甚至非洲、印度有人想聽我唱歌，我都想去呀！」