陳慧敏（慧敏哥）宣布推出新歌《十年如一日》，作為慶祝自己出道十周年的生日禮物。新歌邀請到林夕填詞，慧敏哥感恩之餘，亦感謝對方能夠「兜巴摑醒自己」，她說：「呢首歌係夕爺送俾我，去審視自己過去嘅光陰究竟過成點，老實講，我唔係太滿意過去十年喺樂壇嘅成績，覺得幾停滯不前甚至係原地踏步。夕爺嘅歌詞真係一嘢擊埋嚟，就好似講緊我蹉跎歲月嗰種無力、迷茫感覺，我好感激佢用呢份歌詞，一巴掌去摑醒我，而俾夕爺摑醒我，就算痛，都係覺得抵嘅！」
慧敏哥更表示即使輸足十年，為夢想，仍會選擇繼續賭下去：「呢首歌入面，老實講，有好多可以打動到我嘅歌詞，好似『為昨天賭上明天』、『別要等，被自己討厭』如將我嘅歌唱事業比喻為一場賭博，可能我真係輸咗十年啦，但係我問自己，輸咗十年，繼唔繼續賭落去呢，呢一刻，我決定為我嘅夢想去付上呢個責任，所以呢單嘢我真係連棺材本都攞埋出嚟喇！」
問到過去十年最大的得着，慧敏哥指是結識到一班對自己不離不棄的朋友，同時，她亦慶幸去年疫情最嚴重時，自己能夠從澳門返港，認識到現時的合作夥伴，亦因為一班年輕人，讓她知道這個地方，仍有不少人喜歡舞台上的自己：「因為香港呢個地方，香港嘅人冇放棄到我，我先可以喺今日冇放棄到自己，有勇氣去重新出發。」