下月將與香港管弦樂團舉行紅館演唱會的李克勤，今天（26日）推出新歌《弦續》，並同步宣布六場紅館爆滿，現加開5月20日終極尾場，5月3日公開發售。新歌MV以「散聚有時」為基礎，並以婚禮現場及教堂追思會作為兩大場景，克勤坦言因為疫情，已很久沒有拍過這麼「多人」的MV，他說：「台前幕後好多人，開頭係有啲唔慣，因為真係好耐冇拍過MV，唔知以為自己社交驚恐，哈哈，不過好快就適應，氣氛好熱鬧。」
克勤指MV中有很多大家熟悉的面孔出現：「呢個MV其實係講曾經一班友，大家一齊玩音樂，但經過咗一段時間後，就各有各嘅生活，可能有啲已離開咗香港，甚至離開咗呢個地方，又或者有唔同嘅人生經歷，過咗咁多年後又再聚埋一齊嗰個感覺，好濃厚嘅人情味。所以其實咁多人拍攝係好開心，同埋需要一啲好出色嘅演員去做，最開心邀請到袁富華演出，佢之前拎過金像獎、金馬獎男配角，亦都提名過金馬獎最佳男主角，仲有駱振偉同蔡潔就係飾演一對新婚夫婦。」
克勤又指錄歌時已經感受很深，以前總以為，人生最美好的是相遇。現在才明白，其實難得的是重逢。到今時今日更加覺得，最希望所有朋友都別來無恙，他說：「其實我做咗爸爸之後，都長達七、八年冇乜社交活動，時間除咗分咗比工作，就幾乎用晒喺家人身上，囝囝大咗先開始有返空間見多啲朋友，所以唱時都好有感覺，歌詞講到好多人長大後的心聲。」他又表示這個年紀，多少也會有這樣的經歷，因為各種原因，將感情放在一旁：「曾經嘅一啲老死，會因為大家嘅生活圈子、方式、環境唔同咗，感情可能擺埋一邊。當然隔咗咁多年之後冇見，就少不免會想當年，每一次都係咁，以我嘅經驗嚟講。」
