由馬時亨主持的訪談式綜藝節目《馬時亨．香港情》，昨晚（6日）播出第三集。今集主題是「家庭．教育」，邀來鍾鎮濤（B哥哥）及張智霖（Chilam）兩位好爸爸大談仔女經，溫馨又有愛。
Chilam有「不老男神」之稱，談到現年16歲的囝囝魔童時，笑言對方很「另類」，雖然彼此有商有量，但喜歡逆媽咪袁詠儀意，「好正常，16歲比較反叛，同我好啲嘅，從細到大都close，好好傾。」魔童前年跟隨Chilam到內地住了數個月，同行還有靚靚，Chilam偶爾要離開一段時間工作，最難忘有一次是魔童踏單車追着他搭乘的車子，「嗰時佢十四、五歲，每次我離開工作佢都唔捨得，嗰段時間係佢啱啱想長大變成一個男人，但心裏面依然對你好依賴。我記得嗰晚車嚟接我喇，嗰次要走一個禮拜，佢好唔捨得，喺後面一路踩住單車追住，我都唔敢回頭，嗰個情景好觸動。」
Chilam覺得FaceTime等科技發展，雖然對於維繫家人之間的感情是方便了，卻覺得欠缺了一樣重要的東西：「少咗人同人之間嘅思念，我以前會寫信俾媽咪，因為我去咗澳洲讀書，你寫嗰封信時係好真情切意，然後寄出去等佢回信，呢啲嘢又可以keep喺櫃桶。思念是一種很玄的東西，無論男、女朋友之間，定親情之間嘅浪漫都係，有啲嘢都係值得保留。」Chilam說畢即忍不住自嘲old school，但還是強調：「嗰啲嘢好有味道。」
Chilam續指魔童天性善良，並舉了一個兒子在外國拾到錢包的反應作例子：「我哋一家去咗英國，我同阿仔去食漢堡包，有個女仔經過時跌咗銀包，個仔執咗就即刻去追番個女仔。但我個仔嗰時唔係好大個，九到十歲左右，但佢完全冇猶豫，呢個係我要學習嘅嘢。可能我相信性本善，佢係有呢樣嘢喺裏面，我一路睇住佢係正氣嘅，我覺得幾好。」不過人總有犯錯時，Chilam會視乎魔童犯錯的嚴重性而決定如何處理：「例如對人好冇禮貌，或者亂衝馬路，嚴重嘅嘢我會好嚴肅，但其他嘢可以easy going。人生已經咁困難，點解仲要更困難呢？我會叫佢自己諗吓啱唔啱，我唔會話唔准做呢個唔准做嗰個，有時明知你會瀨嘢，但無傷大雅嘅，我都會叫佢試吓。」
有一子三女的B哥哥則強調做父母亦需要與時並進，笑指對於三名女兒的教育方式，有隨着時代轉變作出調整，因為現今社會的小朋友才是話事人：「都需要似朋友咁相處，以前要成20歲先（同仔女）傾到偈，譬如我第三個女成熟得早啲嘅，可以好似朋友咁同佢傾偈，咁先可以了解多啲，仲好似嚴父咁，佢就乜都唔話俾你聽」。B哥哥很著重為小朋友開拓眼界：「依家啲細路見識要多，依家十幾歲同我哋以前差好遠，依家每個假期梗係去一個地方玩，冬天滑雪、夏天去海灘，佢哋見識唔同咗，吸收嘅嘢都唔同，可以與時並進。做家長都係，我最大嘅細路同最細嘅細路，對於我都好有影響，咁我咪一路學，活到老學到老咯。」B哥哥自言在家中主要角色是陪玩，並在太太發惡時扮演「白臉」。
B哥哥還分享了與三名女兒的個別難忘事件，提到大女兒的經歷時，坦言內疚：「我大女嘉晴佢從來唔運動，但無端端有一日佢叫我去運動會，我又唔得閒冇去。佢返到嚟我問佢有冇參加咩？佢就話兩金一銀，我就話：『吓？點解咁犀利？』我嗰時先知道原來佢跑得幾快。我好罪過，原來佢咁叻我都唔知。」
