由譚詠麟、鍾鎮濤、彭健新、陳友及葉智強組成的溫拿樂隊，1973年成立，今年成軍50周年，八月將舉行第九次紅館演唱會，這次「合體」之後，溫拿將與歌迷正式告別。
今次溫拿在《明周》宣布告別，阿倫解釋：「凡事都有一個終結，趁住大家仍然在一個好狀態。」他們又以志偉開party來比喻，「未醉之前影咗張合照先。」
溫拿是華語樂壇最長壽樂隊，其實早於1969年，譚詠麟(阿倫)、陳友、彭健新、葉智強，還有陳百祥和陳百燊兩兄弟已組成The Loosers樂隊；1971年，陳百祥兩兄弟到中東工作，阿倫亦到新加坡升學，The Loosers只好解散。
直到1973年，阿倫返港重遇陳友、彭健新、葉智強，四人決定重組樂隊，鍾鎮濤(阿B)相繼加入，在Uncle Ray建議下，由The Loosers改名為The Wynners，也就是溫拿。
上次溫拿開騷，已是16年《溫拿NEVER SAY GOODBYE演唱會》，今年8月6日，他們第九次於紅館開騷，這次名為《Farewell With Love》，顧名思義，這次是溫拿的告別派對，阿倫一臉正經說：「容許我代表大家講少少說話，我想嚴肅少少，我哋五個都是香港仔，生於斯、長於斯，但凡事都有一個終結，不過，今次是哀而不傷，雖然帶着無奈，同時亦都帶着開心的心情，趁住大家仍然在一個好狀態，講真，我哋都要量力而為。」
阿倫以志偉飲醉來比喻告別，「我們都要顧及歌迷，溫拿有好多不同層面的歌迷，在最頂嗰層，將來有沒有機會再睇到溫拿在舞台呢？真係唔知道，提早搞個party囉，曾志偉成日都係咁，開party前影咗相先，因為醉晒就影唔到。」
溫拿多年來，都有傳過他們告別，問今次是由誰發起這個決定？阿倫說：「是大家傾好的，其實對上一兩次開演唱會時，都有人講過話不如告別啦！我當時係大力反對，溫拿很代表香港、代表一種精神力量和正能量，不過，其實這個能量不會消失，如果香港將來有什麼需要我哋，我哋一定會企返出嚟，為大家效力，但係一些商業性和大型演出，我哋就不會再答應出現。」阿倫續說：「可能有人話，喂！你哋咁樣講告別，會唔會係諗住開多幾場呀？冇，唔需要。」
五位一票通過告別？陳友說：「其實都冇乜好反對，人生規律，阿倫講得好好，就好似志偉開party咁，未醉之前影咗張合照先，邊個飲醉咁點呀？人生估唔到，聽日會發生乜事？咁不如開個party先啦！」陳友爆料，很多年前，是他提出溫拿停一停，「都幾十年前，好似喺商台定港台？有個草地應該係港台，當時阿B和阿倫開始好多人搵佢哋周圍飛，我哋做完宣傳又攤喺草地傾偈，我就同班兄弟講，喂！不如大家各自發展下先啦。」阿健補充：「係呀，嗰陣溫拿仲玩緊㗎嘛，突然間陳友提出呢樣嘢！」阿倫又插嘴，「喂，呢啲係我哋私底下講㗎！嗰陣時我有講過，點都好，每五年聚一次啦！所以咁多年來，五年、八年都聚一聚。」
