約周永恆到餐廳訪問，家住天水圍的他說：「我都唔知幾耐冇出過嚟銅鑼灣！」出發前，太太在家中為他化妝，已經和好如初的老婆對他說：「老公，你好耐冇做專訪，一定要靚靚仔仔！」周永恆說：「個樣愈來愈老，靚仔冇用㗎喎！」眼前的他滿身肌肉手臂粗壯，「我成日作歌又成日做運動，我冇肥過呢幾年，唔通要出show先減肥，先唔打邊爐咩！」
上星期公布應鍾培生之邀，12月將與霍哥打拳對戰，想重新站出來？「我都唔識分有冇出定入，點分呢？其實最大敵人一定係自己，我覺得自己老，差唔多40歲啦，我最想得到自己轉變，藉住呢一件事，自己入面有內在修為。」世紀賤男衰又衰過，人渣錯又錯咗，周永恆現在打拳降怒火，這幾年間做外賣仔生涯更有領悟，他坦言需要低潮受苦，紋了FAITH（信仰）字樣圖案在左肩的周永恆說：「最緊要我老婆好愛我依家，我個仔好健康，我都好健康！」
問周永恆今次應戰拳賽，酬勞多少？「鬼有一百萬咩！我又唔係林作！我又唔係打佢！羊毛出自羊身上，你值幾多咪幾多！」他笑言：「有冇十萬？加埋囉！但都唔關錢事，唔夠我俾兩堂律師費！」周永恆說，他與鍾培生因為愛打機而認識，「我識咗佢差不多十年，我成日都話，如果我遲啲出世，我應該係電競選手，因為我真係打到黐線。依家有機會合作，佢由電競到競技轉trend，上年我睇到佢個拳賽，我已經message佢 ，我話再有呢啲嘢預埋我呀！」
周永恆說，最希望藉今次拳賽，可以修練自己的心，以往的他，怒火多的是，「點解要嬲呀？如果人哋激你，應該俾咩反應？沉住氣還是作出反應？呢一個內在思辯，其實我從來都冇修為過。你見我好火好躁，好容易俾人激嬲，做錯好多嘢好衝動，呢個係周永恆，有冇一個位俾我去tune？原來對打嘅時候，武術入面，個武字點寫呀？一個戈，下面一個止，係好平衡，停止個干戈，入面都有啲哲學。」他坦言：「呢一刻我仲係39歲，我有冇停止過自己內心嗰個干戈？我識唔識得點樣去同自己溝通呢？原來從來都冇呢個訓練呀！我從來都冇呢個學習，直到我最近開始打坐，思考能量轉換，我搵到啲嘢喎呢段時間。」
衝動又易嬲，周永恆家常便飯。今年4月在家中與太太陳薇發生爭執，並涉嫌出言恐嚇，警員到場調查，周永恆被帶到元朗警署後拒絕配合警員，更向警員吐口水。周永恆早前在屯門裁判法院承認抗拒警員及襲警兩罪，案件至下月12日判刑。問周永恆擔心判刑結果嗎？他說：「有咩好擔心？一篤口水！我真係想乾脆痛快啲，你知唔知我律師費都要幾蚊，我一個月都要打份工，所以我係冇錢，你再咁玩法，係咪一嘢搞掂佢先！坐監唔使俾錢，仲有飯食又夠刻苦，我又可以喺入面操嘢繼續練。」與太太爭執涉恐嚇一事，周永恆的老婆已經銷案，一家三口現在好好過生活。
連命都冇仲理得你點睇
引爆家庭風暴，源自去年12月周永恆做了一個割除腦水瘤的手術，之後得了驚恐症，「我上年做咗個腦部手術，呢度有個窿，全身麻醉後遺症誘發咗我有驚恐症。我返到屋企休養時，捉住老婆、我阿媽隻手，跟住睇醫生確診咗驚恐症。我食緊藥，啲躁鬱情況出現，我老婆又好鬼細膽，走去敲門（報警） 之後cancel唔到，跟住就變咗嗰件事。 Anyways，我屋企好好，經歷咗嗰件事 ，自己屋企人先知，好難同你哋去解釋，總之唔係你哋諗咁樣，反而依家更加了解大家 ，更加珍惜大家。」現在每日仍要食一粒血清素，鎮靜劑已不用服用，經過近半年的治療，周永恆說現時情況已好了很多，「好感恩，雖然好耐冇用呢個字眼，但真係好好彩好感恩，我得到咗自己個健康返番嚟，呢個過程入面我珍惜生命，知道有啲咩應該要去重新把握，有啲咩應該要放手。」
對於網民大眾的負評，周永恆說：「我命都冇啦，我仲理得你點睇咩！我又唔係神，連耶穌都改變唔到，連佛祖都要你自己慢慢修佛啦，我何德何能去改變人哋睇法？最緊要有事嘅時候，邊個最關心你，你命都冇嗰時，邊個喺你身邊，邊個真誠問候你，唔係嚟抽水嗰隻，你完全睇到晒，唔係逆境，俾唔到呢啲嘢我。唔好再俾人哋摧毀，然後你又喺度嬲，人哋見到你嬲又好想炒作，跟住惡性循環繼續出現，我唔係entertain緊你哋，又冇錢收嘅！俾你抽水，我即係人血，你就饅頭，我咪戇居呢件事，唔制喇依家！我啲血留返俾個仔，留返俾我屋企人，留返俾珍惜愛我嘅人！」現在依然會不斷作曲寫歌的周永恆，隨即在手機找來氹回老婆的創作給記者聽，其中的歌詞「如若當初很快樂 是我身體的跌蕩（宕） 你怎會漸變凶惡 如成長的太快要落堂」。
17歲就出道入行的周永恆，藏毒婚變偷食人渣家暴乜都有，很多同期出道的藝人和朋友，都已經成陌路；連帶他入行的親阿叔周啟生，也不相往來，「同期有邊個呢？方力申囉、陳司翰囉、Twins嗰啲囉！大家都四張嘢，有家庭未？有小朋友未？未嘅話可能有好多錢，有好多粉（絲），愛情試成點？結過婚未？離過婚未？跟住依家係點呢？睇返好似校友會咁，個個都有自己成就，所謂嘅成就啦！有啲我特登搵佢，佢會避開我又有，費事講佢個名啦，有啲聲稱係姐姐嗰啲，跟住轉頭冚你線又有！我覺得個低潮好緊要，人生冇理由長期高潮，低潮係令到你認清身邊人嘅真實，低潮係要你知道真正價值，低潮係由量變到質嘅過程，低潮係高潮嘅前奏！」
我送外賣需要嗰啲錢
周永恆說，以往的憤怒，來自恐懼與不安，「入咗行開始驚，咁恐怖呢一行，個個都好似唔知信唔信得過咁，明明簽咗俾個親戚㗎啦，個親戚又好似唔夠親喎，然後憎咗我成世，唔講佢咩名啦，我都唔知佢點解咁憎我，我成日都有搵佢㗎，我得閒Facebook佢，我呢排有習武，Hi下佢希望有啲話題，冇辦法！可能真係祖先墳頭漏水浸咗，我哋都喺度整返，真係浸咗，唔到你唔信，我唔希望世界太多紛爭，唔應該有，尤其係屋企人。」
屋企人，與周永恆曾經是屋企人的前妻阿Yu趙頌茹，兩人於10年奉子成婚，婚後誕下兩女，14年發生婚外情又家暴事件，18年才正式離婚，同年周永恆與內地女友陳薇結婚，再誕下一子。已經有多年未見過兩位女兒的周永恆，問他是否很掛念女兒，他坦言：「唔算得叫做好掛住，由好掛住變到避開小朋友，嘗試唔諗，去到希望大個佢哋會搵我！有個諗法唔想打搞佢哋生活，我都希望尊重阿Yu自己生活路向。我有一次五、六年前喺新蒲崗撞到佢，我喺後面叫停佢，佢好驚，跟住好急咁話，你唔好過嚟呀，過嚟我就報警、我打俾記者！我唔知我喺佢眼中係一個咩人，或者真係好恐怖！我想佢平平安安生活，佢有自己選擇，或者我係佢嘅恐懼，反正我尊重佢，唔會打擾佢。」
大家各自好好生活。周永恆這幾年，為了生活去了做Foodpanda外賣仔，他說終於「落地」學做人，「我同大家一樣，喺香港入面戴住個口罩，跟住冇咗自己，大家都冇咗自己、冇咗個生活。我戴住口罩做Foodpanda，喺屋企附近（天水圍） 做外賣仔，送下外賣，學下做人，落下地。」周永恆說，他其實從未正式打過一份「落地」工，「衰衰地叫做一入行做歌手，之後打份電視台工作做音樂（曾於無綫音樂製作部），都仲未落到地。做外賣仔，會鬧人喎開頭，跟住慢慢同老闆傾偈，原來間餐廳一日賺好多錢，唔似娛樂圈入面嘅人，個個戴隻手錶，假嘅原來，跟住周圍問人借錢，有好多嘢原來唔係你睇表面。最大impact係啲管理員，成日話要登記，然後就寸你啲外賣仔低人一級，我成日都同啲管理員嗌交，但係我諗下諗下，開始換位思考，原來個個都係最低工資緊喎，最低工資咁樣生活，出緊幾多糧？你又交幾多貨呀可以？」
周永恆做外賣仔得到另一番領悟，「我曬住個外賣咁嘅心情，我都好鬼窮，我為廿零三十蚊咁鬼出汗，你點睇我？我又點睇你？原來個個都一樣。以前根本就太離地，我做完外賣仔之後，點解要送外賣？點解要跑嗰張單？因為有一啲人要養，要生活、要負責任。點解要去急去勞氣想快啲呀？因為錢，因為想俾好啲嘅生活屋企人呀！你去急去躁去火，你啱定錯，冇對錯成件事，個個都要養家，個個都喺度流緊汗，有咩好嬲呀？呢個價值觀獲取到之後，我再退返出嚟睇，其實好多嘢，我唔係咁睇你，你就唔係咁睇我，最後發覺原來係照鏡，其實你都可以係外賣仔，你又可以係管理員，冇分別！其實我需要低潮，需要受苦，我唔夠苦，因為太多嘢被安排得太好啦開頭，未讀完書就知道會出碟， 中二我放學已經喺度練嘢錄音，未夠秤就出碟，都係被安排。 其實我覺得好自由，我係送外賣，我愛我嘅屋企人，我需要嗰啲錢，尤其落雨特別鍾意去送，因為訂單特別多，同埋條街特別少人，然後雨水令到我個人好清醒呀！」為時未晚，清清醒醒，好好生活學做人。
場地提供：Zeng
