陳奕迅（Eason）用了一個多月巡演北美，創下首個華人歌手於北美Arena開六場演唱會的紀錄，近七萬人觀眾看過他的演出，創下驕人成績；並且是首位踏足San Francisco Chase Center開show的亞洲歌手，場館更特別為他訂造一件刻上他演出日期的FEAR AND DREAMS黑色外套作紀念。
Eason由8月27日飛去紐約，到9月27日才返港足足一個月時間，Eason謂每一站也很難忘，比過往總是馬不停蹄，今次有時間好好休息聲帶，又可以感受當地城市，及與在北美生活的舊朋友會面，所以都幾開心，「其實我夜晚好少出街不過日頭有時間就去過睇網球賽，同朋友見下面聚下舊，冇諗過shopping，但竟然都買咗幾塊網球拍，係Chicago仲迷上咗一樣新運動，叫做Pickleball，唔覺意又買咗幾塊拍。」另外他亦是第一次帶過百人的團隊一起巡演，「百幾人一齊去北美巡演，呢個團隊真係令我覺得好自豪， 第一次咁大隊人一齊出發，好多謝佢哋呢個月為我付出啦，唔單止開工，重要係北美成個月咁耐，又要佢哋去玩同使錢，哈哈。」
對作為首位華人歌手在三藩市那場館演出，Eason謙說：「係咪第一個都唔係咩特別，我最緊要反而係觀眾睇得開心，明我個騷講緊咩，最開心係收到唔少歌迷睇完騷啲留言，佢哋話入場聽到好多從來冇聽過嘅歌，冇《十年》，冇《單車》，冇咩咩咩……但演唱會完了發現嗰啲未聽過嘅歌都好好聽，現在歌單之中都係我嘅『新歌』。我估佢哋係接收到個騷，呢個先係令我最開心。」
網傳Eason溫哥華門票賣得不是很好，Eason於溫哥華舞台上望着全場爆滿觀眾笑道：「好多謝你哋，之前話溫哥華啲飛係賣得最差，但係依家又唔係好覺喎……咪又滿晒，幾好嘢喎你哋！俾多啲掌聲大家！我知啦，係你哋慢，聽講你哋係慣咗買飛買得好慢，我差啲諗住咁不如取消咗佢啦。來到溫哥華我知啦，我嚟到都唔係好想做嘢……啲天氣又落下雨咁，個人剩係想唔做嘢，行步路都慢！」他又跟觀眾開玩笑說：「咁慢！呢次可能係我最後一次嚟啦！」觀眾大叫歡呼：「唔好呀，一定要再嚟呀！唔好走啦！」令Eason爆笑。
因為溫哥華是北美的尾場，所以Encore時他唱了三首歌，令觀眾十分開心，又忍不住爆出好消息，5年沒有出唱片的他向觀眾說：「我就快出碟啦！錄咗好耐啦，隻碟同Fear and Dreams好有關係，好希望隻碟可以帶到力量俾大家，喺大家經歷過好多唔好嘅事、壓力同驚恐之後，可以一齊停一停，放鬆呼一口氣，抬頭再望，原來重有路可以繼續行， 幾時出稍後會公佈。」
演出完之後，Eason留於溫哥華過中秋，跟當地好朋友聚舊，他表示：「祝大家中秋節快樂呀！唱完溫哥華就唔落雨天，天氣好好，我出咗去享受下城市氣氛，當地真係好多老朋友，所以就留多兩日大家一齊過節開心下，之後返到香港就要收拾心情，為十月澳門9場演唱會做準備啦。」
