陳慧嫻日前與泳兒（Vincy）及許靖韻 （Angela）到美國加州舉行兩場演唱會，慧嫻透露上一次到美國已是五年前，十分掛念歌迷，「好開心再一次嚟到美國表演，有啲歌迷都同我講，前幾年睇完我美國演唱會後都一直掛住，想我快啲再過嚟開個唱，希望遲啲有呢個機會。」Vincy表示很久未試過離開香港一段長時間，執行李時發覺太多東西要帶，想着同事應該可以幫手，不過事與願違，「喺機場時，想分俾同事幫手裝，點知原來大家都已經唔夠位，逼住要左攝右攝，哈哈。」首次到美國出騷的Angela直言出發前三、四個月已經十分興奮，「係咁睇一啲關於嚟到三藩市同埋洛杉磯嘅一啲可以去嘅地方，希望喺完騷後爭取時間去行吓街。」
問到難忘事，Vincy坦言是慧嫻在台上的悉心安排，「綵排時，主辦煞有介事叮囑同慧嫻姐姐合唱完唔需要talk環節。真正on show時，合唱後，想邀請慧嫻姐姐去後台休息，點知佢好似唔想離開，原來係全場大合唱生日歌，突然收到幾千人祝福。」慧嫻則說：「我向 band leader同監製提議喺台上俾驚喜佢，當佢以為同我合唱完後，我就將舞台交俾佢時，我喺台上宣布今日係 Vincy生日，帶領觀眾一齊同Vincy唱生日歌，見到佢驚喜個樣我都好滿足。」Vincy切蛋糕時，慧嫻更封了大利市給她，「祝佢以後一切順利，有個開心難忘嘅生日，再一次見到佢驚喜個樣，諗番都覺得好笑。」三人首次合作開show，除了獨唱，亦有合唱部分，慧嫻跟Angela合唱《跳舞街》，「唱完我好奇問佢點解會識唱我嘅歌，始終年紀都差咗幾個generation嘛，哈哈。佢話因為小時候父母都成日聽我嘅歌，所以佢對我嘅歌曲都非常熟悉，可以同年輕一輩嘅歌手合作對我嚟講係一件好開心嘅事。」
由於這次美國演出行程緊密，慧嫻及Vincy都未有特別安排行程，不過二人都不約而同在兩場騷的幾日空檔四出覓食，慧嫻謂：「唯一就係到埗後放低行李就即刻去咗快餐店，很想重溫一下我大學時期嘅回憶味道。」至於Angela表示很貪心想去多個景點，將自己的行程排得非常緊湊，「一次過去咗兩個主題樂園，私下行程係非常之忙碌，不停爭取機會去拍咗啲vlog，同埋影咗好多靚相。」