歌唱真人騷《中年好聲音2》,周日晚(7日)上演合唱歌對決,16強選手將分成8組,演唱完畢後,評審團將退庭商議決定淘汰留在危險區的其中一位!
獻唱《你最珍貴》的古淖文+安雅希睇頭十足,兩人以黑白雙煞造型上陣,非常合襯,合唱時更是默契十足,唱到拖晒手仔之餘,還不時眉目傳情,演唱完畢後又攬作一團。肥媽大讚:「我覺得你哋兩個非常之襯,以為你哋兩個要結婚添呀!」張佳添說:「雅希,我愛上咗你把聲,同埋要特別讚淖文,你哋兩個之間有好多空間畀對方去發揮,Feel到兩個人好細膩嘅情感。」伍仲衡則笑言:「你執到啦淖文,我同佢(安雅希)唱我都高分啦!不過你都唱得好好,由開始覺得你好Show Off,直到你上一次回合開始,Feel到你諗番咩係唱歌。」
獻唱《難為正邪定分界》的劉可+朱博文同樣值得關注,大玩人魔對唱的兩人玩味十足,有大魔王之稱的劉可以半Opera式獻唱,又Chok聲大玩Rock聲嗌咪,惟評審團的反應大相逕庭。陳慧嫻看得很開心拍爛手掌,伍仲衡則露出不明所以的表情!陳慧嫻點評時說:「我係好接受你哋今晚嘅表演,我睇嘢比較係Out Of The Box,鍾意啲嘢係突然跳咗出去!」周國豐說:「劉可你要小心,唔好走咗諧星嘅路線。」張佳添則說:「我好Appreciate劉可嘗試帶個舞台感出嚟,但主要問題係你哋把聲好唔Blend,Feel唔到人魔對唱嘅感覺!」