Twins《SPIRIT》2024演唱會昨晚（26日）來到第五場，剛巧是鍾欣潼（阿嬌）農曆生日，萬人再次大合唱中文版《生日歌》向她祝賀；當唱到《相愛22年》前，兩人深情對話部分，更是一晚比一晚感人，兩人邊唱邊哭，蔡卓妍（阿Sa）邊唱邊深呼吸落淚，阿嬌則進入缺堤狀態，哭到淚流滿面，而現場不少歌迷也跟着她們邊唱邊落淚。
阿嬌農曆生日，有歌迷扮成禮物大叫，祝她生日快樂，阿嬌笑道：「嘩，你唔係送你俾我呀？我唔要得唔得呀？我唔知擺喺邊呀‥‥‥我唔識點養你‥‥‥」引得哄堂大笑。阿Sa笑完後就叫全場萬人大合唱中文版生日歌，向阿嬌送祝福，氣氛歡樂又高漲。
兩人之後再準備唱《相愛22年》，阿Sa說：「22 年前真係想像不到，呢個係我哋嘅將來‥‥‥」阿嬌和應：「第一個演唱會後，都唔知仲有冇得再開‥‥‥」阿Sa補充道：「咁多年，有好多人可能會話，Twins好好彩，其實我哋條路一啲都唔平坦，一開始係好純綷嘅快樂，過咗幾年，就開始唔係好識笑。」阿嬌則說：「 我仲難啲，我記得一開始，Mani不停叫我笑呀笑呀，我真係好辛苦，到慢慢開始，好多人支持我，覺得被人重視啦，我先笑容多咗，同你一齊又開心，打開咗自己。」阿Sa：「神奇嘅地方係，我地細個咩都唔識，由『也也烏』好開心開始，之後感受到好多人情冷暖，開始自己識思考，慢慢有幾年，真係好似笑少咗，但係好慶幸，我哋真係好努力到走過咗呢啲階段。」阿嬌：「終於嚟到呢度啦‥‥‥」阿Sa:「係呀！恭喜你呀！」然後她們走向對方，感動地相擁，不過因為太激動、太開心，相擁時竟然撞向對方臉上，然後傻傻大笑，把原本感動落淚的歌迷也破涕為笑。
阿嬌之後笑說，「終於等到今日啦！哈哈哈！」阿Sa：「係呀，終於去到今日啦，終於可以鐘意笑就笑，喊就喊，享受人生，呢個工作，自己想做，呢個唔好做！」阿嬌：「係呀，有選擇權！終於到呢個moment，實在太感恩啦！」兩人接着向歌迷道謝：「當然有一個元素係好重要，就係你哋！如果唔係你哋呢 22 年，一路係我哋背後支撐我哋，我哋真係唔會行咁多，多謝你哋咁多年來嘅包容，多謝你地嘅愛。」此時，阿Sa更是感動得哽咽起來，哭着說：「多謝你哋所有人，係我哋最唔好時侯嘅鼓勵，好緊要真係‥‥‥以下落來呢隻歌，唔係剩係講緊我同嬌，係講緊我同你哋嘅關係，相愛22年。」起歌之後，兩人也是哭着唱，阿嬌更是淚流滿面，而阿SA則不停強忍淚水，免得唱不下去。
由於是阿嬌生日，昨晚阿Sa就特別讓觀眾點歌，多唱一首，現場投票後選唱《士多啤梨蘋果橙》。兩人又問觀眾借來電話睇歌詞，想不到阿Sa借來的手機，唱兩句後，電話響，她情急大叫，「哎呀，你Daddy 打俾你，死啦，點算‥‥‥」阿嬌便安慰她，「唔好亂，唱埋先！」引來全場爆笑。
