新城廣播為紀念日前猝逝的資深DJ鄭啟泰製作《怪你過份美麗 紀念鄭啟泰》特輯，參與錄音的包括他的胞妹Fiona、未婚妻王雁芝（Angie）、薛家燕、樂易玲、啤梨、范振鋒、伍詠薇、姚嘉莉、張佳添、林祖輝、可宜、官詠儀、鄧潔明、陳小芝、林德信和周禮茂。
當中Angie表示：「人生係長跑，但我呢位長距離Roller選手竟然入咗去短跑跑道，可能我哋爆發力太強，我哋愛得太轟烈，相信不在乎天長地久，只在乎長期心裏擁有，希望大家記得鄭啟泰的好，繼續延續佢的正能量。I Love you 鄭啟泰！I Love you 老公！」
Angie錄音留言：
認識鄭啟泰的人都知道好鍾意整蠱人，今次真係大整蠱，先求婚，之後自己走咗去唔理我，好多朋友都話點解妳可以咁堅強㗎，想哭就哭啦，我話其實我已經哭完啦，哭完就要笑番。
記得每一次我哭，佢都會話：哎吔，全世界最醜樣係妳呀，快啲笑番啦，嚇C人咩。
接受他訪問時而認識，開始時冇乜好感，唔鍾意佢啦，又唔打招呼啦，識落之後拍拖，佢好特別好識享受人生，佢會開着音樂跳舞掃地，又會帶我去銅鑼灣油站對面開張枱野餐，亦會自製Menu在我刷牙時貼在窗寫：「Chef Eric’s menu of tonight With unlimited kisses and hearts!（廚師Eric是日精選，無限個錫錫同心心）！」係咪好浪漫呢！
佢曾經講過唔會結婚，竟然可以令到呢隻冇腳的雀仔向我求婚，我仲記得當晚佢同我講過：「老婆，以後記得改口叫老公啦！」係咪估你唔到呢！識咗佢呢兩年，係我人生中最幸福、最浪漫的，我好慶幸識到佢，可以陪佢行到最後一秒，雖然佢已經唔喺度，我會延續佢的快樂，成為Eric 2.0繼續開心咁行落去，人生係長跑，但我呢位長距離Roller選手竟然入咗去短跑跑道，可能我哋爆發力太強，我哋愛得太轟烈，相信不在乎天長地久，只在乎長期心裏擁有，希望大家記得鄭啟泰的好，繼續延續佢的正能量。I Love you 鄭啟泰！I Love you 老公！
薛家燕錄音留言：
當我接到鄭啟泰離去消息，我心裏面真係好難過，當晚轍夜難眠，點解咁呢？因為大家做同事已經超過十幾二十年，鄭啟泰俾我哋感覺真係好和藹可親，好幽默，而且好多嘢我哋可以向佢學習，因為佢真係一個好成功，好資深DJ。我記得去年，佢話會出一本書，叫做《如何七日成為演說高手》，啟泰就話：「家燕姐呀，幫我寫序呀！」咁我就話：「嘩吓！我點識寫呀！我真係好多嘢要向你學習！」佢就話：「唔係呀，家燕姐，妳有好多方面唔同做法呀嘛！妳幫我寫個序，支持我啦！」
我真係幫佢寫咗個序，佢仲送返本書俾我，我攞本書時，佢當然話多謝我，我反而話：「我多謝你呀！」呢本書對我嚟講係好好學習機會，我會好珍惜，慢慢睇。
佢除咗和藹可親、幽默感之外，佢好鍾意幫助人，當我哋一、兩年前，我哋要做網上直播，乜都唔識，好多時要請教佢點樣做，用咩儀器，佢一一不厭其煩教我哋，佢仲連埋儀器借埋俾我哋用，所以佢係一個好難得、好難得嘅好DJ，同埋好同事。
記得有一日，因為佢離開咗新城電台（廣播）成半年，佢突然WhatsApp我同我講：「家燕姐，我可能返嚟同妳做同事呀！」我即刻（開心）問係咪真㗎？我係好開心，所以喺1月30日，我哋一齊拍賀年節目，大家擁抱，而佢仲話要錫返我一啖，其他同事喺度講笑：「嘩吓，乜我哋咁開心呀！」我就話：「係呀，真係好開心，見返鄭啟泰，佢返嚟我哋啲氣氛都開心好多，嗰日我哋仲大家一齊互相恭賀，（歎氣）唉，估唔到突然間收到去世消息，真係好難過、好難過（傷心）！唯一係感覺安慰，佢唔使受長期病痛之苦就離去，不過，我真係要同啟泰講一聲：我哋真係每一個同事都好懷念您！好難忘記您帶俾我哋歡樂！
啟泰，希望您一路好走！主懷安息！我哋永遠懷念您！
