「細細粒」陳嘉佳早年轉戰內地發展，由演員轉型做吃播，試過一場直播帶貨一千萬，因而闖出名堂。
肥嘟嘟一向是細細粒的標記，體重高峰時期曾直迫300磅，去年4月細細粒宣布減肥，5個月內成功搣甩110磅。近日由內地回港，細細粒為本刊首度穿上泳裝示人，體重165磅、身形細了幾個碼，距離終極目標130磅好接近！加油呀，細細粒！
已定居內地的細細粒，其實每個月也會回港一次，跟母親食飯見面，但每次只逗留一、兩天，今年農曆新年，細細粒留港放大假三星期。早前網上出現不少細細粒暴瘦新聞，但始終未見真身，這次為本刊拍攝封面，細細粒明顯變咗「細粒」，她早前買了一件黑色泳衣，打算體重達標的時候才穿上，不過訪問當日，狀態十足的細細粒，率先提早預演泳裝。
訪問前，細細粒在家中上磅才出門，她說︰「剛剛磅75公斤（165磅），人生最高峰的時候是128公斤（282磅），真係有100磅了（減）！」問她減肥的原因？細細粒說：「去年初，祖藍迫我入一個減肥營，入到去之後，發現原來自己身體好多問題，高的（指數）都高高地，要超標都超晒標，好唔健康，最恐怖係BMI指數over 36以上，比癡肥更恐怖，會影響到生命健康。」
細細粒坦言，「為食」是導致肥胖主因，過量得太緊要，「這兩、三年做直播，試過賣大閘蟹，一季食了四百多隻、賣榴槤，兩個月食了過百個，由早播到晚，每一日平均十個鐘，當然可以hea食，但我真係太為食，成日覺得冇所謂，食多嚿啫，點知食食下，食到個身體咁樣！」以前細細粒好易出汗，當日訪問前，記者跟她在銅鑼灣行街買衫，不少途人見到她都嘩然「瘦咗咁多？」，她說︰「我依家唔易出汗，起碼成個人健康咗，血壓糖尿等等都回復正常水平。你諗下，我係肥咗三十幾年，今次減肥由頭到尾，用了五個月時間，我以為要起碼用一、兩年，先可以將身體裏面咁多年脂肪、毒素慢慢去清，我真係覺得好值得。」
今次細細粒更公開自家一套減肥方法，「我覺得減肥方法，唔係一套方法做晒就得，去到唔同階段就要轉，因為身體適應了某個階段，我哋所謂的樽頸位，就要用其他方法再將佢打落去。我一開始，先用最簡單的方法戒糖分，所有含白砂糖的東西，我全部都唔食，每日的飲水量好緊要，我會飲夠2500毫升水；之後到平台期，我就由每日三餐變兩餐，食嘢更加按住守則去食，即是幾多份菜、幾多份蛋白質、幾多份碳水等等；再去到第三個平台期，我又用另外其他方法，唔會用一個方法由頭減到尾。」問細細粒終極目標是多少磅？她很堅決的說：「60公斤（132磅），仲有三十幾磅，一定要成功！」
向目標進發，達標之後，細細粒最想的，是行入內衣店，「我肥，並唔係由六、七歲開始肥，真係由細肥到大，我睇返六年班嗰本紀念冊，唔知點解要寫埋磅數，我嗰陣已經165磅，所以我細個啲衣服已經買唔到，係我媽咪用衣車幫我車出嚟；仲有一個秘密，我係從來未去過內衣店，未度過自己的size，好多女仔都知道自己係乜cup數，但我係唔知嘅，由細到大，我都係穿運動型內衣就算，我依家都唔會買住，因為我仲減緊，到真正減完之後，我就會去買。」
肥嘟嘟一向是細細粒的標誌，減肥之後，會否擔心失去獨特標誌？「我出道都十年，拍《老表》時是14年，我覺得大家會為我開心，雖然，大家以前認定了細細粒係肥嘟嘟好得意，咁肥都可以做到演員。其實之後愈來愈多人話我唔健康，今次減肥除了因為健康，我唔想早死過阿媽，生死我唔係好怕，但係唔好早死過佢！得我哋兩個，我哋又冇親戚、冇兄弟姊妹，唔想得媽咪一個人，好陰功。」
細細粒亦因為這次減肥大計，才發現自己的毅力，「毅力係最難，好多人都是三分鐘熱度，我都擔心，但原來有毅力，真係可以成功，包括我開始做直播的時候，講真，依家好多人都想做直播，但唔係個個都敢行出呢一步，因為唔係一定得。當日決心去做直播，都係用呢股毅力，頭四個月冇人識㗎，我一個人喺杭州匿埋喊，好失敗，冇扶持、冇流量，第四次開播都仲係得六十幾個人睇，賣得三千蚊，即係我可能只賺三十蚊！原來要做好多分析，當日祖藍一開播就有十萬人，我諗自己再差都有一、兩千人啩，一路望住個數都仲係六十人，心理質素好影響。我有問過祖藍，佢話幫唔到，要靠自己，原來做直播唔可以當成一場商演，要做好多research，唔係人哋俾乜你賣就賣，或者有流量的明星可以搵到快錢，長久冇可能，講到尾又係毅力！」問細細粒最好的成績，可以做到多少？「接近一千萬(業續)，健康產品，依家大家都講究健康。」
場地︰露營生活@camplife_hk
