由羅子溢、陳自瑤、黎諾懿、賴慰玲、羅天宇及王敏奕等主演的《婚後事》，自播出後引爆網絡熱話，在內地一樣備受熱捧，內地網民在視評網站亦留下不少好評：「五星預定，多視角敍事，Yoyo真是不容易，總覺得出現實中羅仲謙（子溢）很愛孩子」、「TVB給陳自瑤一個視后吧」、「第四集直接讓人淚奔」、「請一直狠下去」。
為了令觀眾更深入了解六位主角的心路歷程及拍攝點滴，myTV SUPER特別推出一系列主演對談訪問，陳自瑤（Yoyo）與羅子溢率先分享。張明芯與潘善仁於第五集的激情親熱場口，Yoyo雖然之前甚少拍親熱戲，但她在拍攝時對於整個劇組，尤其監製及編審都投以百分百信任票：「所以我從來冇質疑過個劇本我應該係演少啲吖，定唔好演到咁，我哋呢個劇會講好多感情好豐富嘅Moment，就好似善仁同明芯即將要分開、又經歷咗咁多嘢，所以咁樣嘅場口或感情戲、先可以帶到佢同前夫嗰種感覺，我只能盡力調節心態去演好。」之後Yoyo竟拋波給子溢並笑言：「當然因為你呢個情場老手，真係帶得我好。」子溢聞言先是一秒尷尬，之後再搞笑俾晒反應：「我從來冇質疑過自己嘅能力。」
Yoyo續指拍攝時很難抽離，更瘋狂至「每日一喊」：「之前拍劇我可以好快走番出嚟，但呢套劇我同你（指子溢）都真係最多情緒戲同喊戲，個情緒困得太耐，（子溢：「可能一日（喊）幾場」），同真係每一日都有喊戲，就算最簡單嘅戲，都梗有一場（喊戲）。但我覺得係好事，因為我已經喺個角色，我唔想太抽離，我都驚自己入唔番去。」
Yoyo追問子溢「對潘善仁的共鳴位」，他指出兩大共通點：「我會將所有責任都攬晒上身，同埋我會沉溺喺自己嘅反思入面，成日自己諗嘢，又唔係好擅於表達，可能有時係男人嘅自尊心作崇，想自己諗方法去解決同安慰自己。」子溢續指與太太楊茜堯由拍拖到結婚也有十年，故此處理角色時感受很深：「真係覺得婚姻有高有低，會有唔啱嗌交嘅時候，三日一小嗌，七日一大拗，可能為咗小朋友都會有啲分歧。同埋亦都明白到一個男人結咗婚之後，係需要一啲空間去沉思，未必想逃避，可能係一個情緒嘅抒發。」
