參加《全民造星IV》入行的何洛瑤（Sica），自小鍾情日本動漫，中學已開始玩Cosplay，最近擔正主持ViuTV節目《回憶守護隊》，到日本各地偵察，尋找各地不同年代的遺物，發掘日本人如何守護回憶。
除了主持外，Sica亦出歌正式加入樂壇，今年以新人姿態打入《叱咤》「我最喜愛的女歌手」7強，這位被網民稱為Cosplay系歌手，到底有甚麼來頭呢？
Sica將會聯同P1X3L三子葉振弘（Marco）、歐鎮灝（George）和吳啟洋（Phoebus），以及葛綽瑤（Yoyo）、許寶恆（Alice）、楊安妮（Win Win）和鍾卓穎（Ash）組成的限定團體「P1X3L 5G」下月於麥花臣開騷。
五男三女開騷，Sica笑說︰「直到呢一刻仲未諗到個騷名，八個人，P1X3L三個，加埋我哋五個女仔，我會形容為一個才藝表演，因為乜都有，好多元化；而旺角麥花臣對我來說，其實幾有意義，我以前就喺黑布街一間女僕cafe表演，cafe入面有個台仔，我會唱歌表演，例如我生日、或者特別日子都會定一個主題，例如懷舊金曲之夜、或者Cosplay event，就連我執業（離職）表演都搞咗場，我記得我當晚唱咗首《係咁先啦》。」
日本Cosplay玩得很盡，Sica覺得香港人對Cosplay也愈來愈接受，「香港和日本的Cosplay文化，已經唔係差太遠，愈來愈多香港人接受到。我記得我在中學時候Cosplay係會俾人笑，雖然身邊同學都知我鍾意睇動漫，但行過真係會有人恥笑我，最近扮Avantgardey個cover，我唔會話係正式Cosplay，其實細心留意，無論髮型服飾都未去到神還原，成件事其實好即興，純粹覺得隻舞幾正喎，佢哋又跳廣東歌喎，拍咗兩三個take就post，但迴響比我想像中大，我有一種感慨，啊，原來依家已經步入了短片時代，原來我拍一條短片，已經會有咁嘅關注度，我諗我哋都要反思一吓。」
神還原Avantgardey的舞步及表情，除了引起網民熱烈討論外，連Seira@Avantgardey都在IG分享兼大讚Sica。今年只得23歲的Sica，身上有很多反差元素，喜歡懷舊衣著，偶像竟然是梅艷芳，她解釋︰「其實是一個榜樣多於偶像，好欣賞她是一位堅毅不屈的女仔，在舞台上有自己個人特色，我覺得她知道自己想點，亦都好勇於表達自己，好關注社會，我特別喜歡她的《壞女孩》、《淑女》，好有Woman Power。」
作為樂壇新人，Sica推出的歌曲《天氣之女》深受年青樂迷喜愛，更打入《叱咤》「我最喜愛的女歌手」7強，Sica說︰「當時知道第一個反應是嚇親，覺得自己未夠班，仲有好多不足，嗰一刻係有心虛，但後來自己慢慢消化，跟朋友傾吓傾吓就諗通了，如果覺得心虛，咁就再努力一點吧，做好啲，令到自己對得住自己，同埋要接受喜愛自己的人。」
參加《全民造星IV》之後，Sica簽約成為MakerVille合約女藝員，隨即獲安排主持節目《MM730-男女自然觀察學會》，她直言從未想過會出歌做歌手，「其實當初簽公司，我都沒有期望有得出歌，因為傾約的時候，我好記得有人同我講咗一句話，『你入嚟之後，可能冇得出歌冇得跳舞冇得上台㗎喎！』所以我一直個心理建設，都係拍吓節目，接吓一些outside job，咁樣我都鍾意嘅，但同時我的興趣是音樂和跳舞，兩件事可以分開，所以與其話裝備自己，可能純粹係因為我好鍾意音樂，所以我咪繼續寫歌、學唱歌囉，希望他朝有一日，真係有機會出歌的時候，令成件事變得順其自然，又冇話係苦等咗兩年乜乜乜，我反而覺得自己好幸運，簽咗公司兩年就可以出歌，其實係感恩，終於做到呢件事！」
幸好沒有放棄音樂，《天氣之女》之後，Sica推出的《再見有時》唱出離別心聲，成功打動不少樂迷，「我知自己仲有好多不足，無論我說話咬字、台風各方面，幸好這兩年沒有放棄過接觸音樂，去睇好多show，《再見有時》呢首歌，so far係好多朋友，路過見到我嘅人，都會因為呢首歌同我打招呼。呢首歌的確令到更加多人知道，原來Sica是一位歌手，未必會話係轉捩點，但起碼在心靈上俾到一個好大安慰自己。其實由細到大，我有兩個淚點，好容易觸動到我情緒，第一個係好奇怪，唔知點解見到人失戀暴飲暴食，我就會好想喊，覺得自暴自棄好慘；而第二個就係關於離別，所有離別都會觸動到我，巧合地上年充滿各式各樣離別啦，特別係自己的好朋友離開香港。」
Sica續說︰「就算拍完《回憶守護隊》，搭飛機望住日本，要同日本講拜拜，我都好感觸，之後就即刻諗到寫《再見有時》這首歌，想同自己講，其實唔使咁sad，可能會再見㗎嘛！」主持ViuTV的《回憶守護隊》，令Sica有機會到日本各地，尋找不同年代的回憶，例如到日本傳統的公眾浴池「錢湯」，原來除供大眾洗澡，另一重大功能，就是讓左鄰右里聯繫感情。
問Sica，香港有甚麼需要守護？她笑說︰「粗口！我唔想佢消失，不過我諗都冇辦法消失，外國人都應該好熟悉香港的粗口。我網上見到有一個韓國藝人去到台灣，大家第一時間，都係教佢講當地粗口，所以就算香港有一日唔准講粗口，我諗香港的粗口已經根深蒂固。」
場地︰@camplife_hk