霍汶希（Mani）近日受麥當勞邀請，分享作為女性成功之道的自身經歷。Mani便從她第一份暑期工說起。Mani說：「我第一份暑期工係做連卡佛。可能當時我係最細，俾人恰就梗㗎啦，叫我攞貨就攞貨，我要徒手爬上去三層高嘅貨架。啲人永遠都係見到我嘅pat pat多，因為我永遠都係推緊貨。」雖然如此，當時Mani心中已下定決心有一番作為，「我好明確同自己講：『我唔理！雖然我今日係咁，但我希望喺呢份工裏面我有好表現，可以表現到俾我嘅manager睇！啱啱入行雖然係做緊苦力，但我走嘅時候或者轉行，我希望做到嗰行最優秀嗰個人、或者嗰班人！』」
Mani在三十九歲那年，決定跳出舒適圈，主動申請到內地工作。不過因為自己的普通話是「有限公司」，發生不少尷尬場面，「有一次食飯，席上全部都係最大嘅4A公司、Magazine入面最大嘅editor。我對面嗰個係一間4A公司嘅老闆，佢著住一件藍色衫，我又著住藍色衫，我就話：『你是不是喜歡男生（藍色）的？』佢擘大咗個口，『是的。』嗰個係男人嚟嘅，原來佢真係鍾意男仔嘅，但佢未出櫃，我真係好尷尬！佢答完之後，我仲要：『你喜歡男生（藍色）的？我也喜歡男生（藍色）的！』真係瘀到呢！」
在跟員工的互動環節中，有員工問到如何帶領「Gen Z」時，Mani便以教女作比喻，她坦言「教女係最難！」她謂以前教藝人，藝人的母親十分感謝她，「呢個年代要認同佢哋之餘，要用啟發嘅方法，我唔會同佢哋講應該做啲乜，我會俾佢哋幾個唔同嘅選擇，但我心裏面當然有一個覺得係最好㗎啦。好似我個女咁，佢唔肯彈鋼琴，佢話：『我唔彈啦。』我話：『小朋友一定要學一個樂器㗎喎，你自己揀啦。』佢話打鼓，打鼓喎，我真係入精神病院。我話：『打鼓都唔錯，但係表姐又拉二胡喎，其實二胡都唔錯。』路係佢自己揀，你不能揀條路俾佢行，你揀條路俾佢行，佢一定唔行！引導，同埋俾幾樣嘢佢揀，揀完之後，你意見接受但一切照舊，用盡自己方法引導返佢揀你自己想揀嘅嘢。」