張天穎（Jaime）昨日（28日）推出新歌《低調》，電子曲風crossover中國風元素，所以今次特別請來爸爸為新歌featuring彈奏琵琶！
Jaime話新歌《低調》的構思，是來自爸爸經常教她做人要「低調」，所以，她便有感而發，將「低調做人 高調做事」這個哲學寫成一首歌，並請爸爸一齊父女檔合作，「其實前後都搞咗兩年，爸爸好鍾意彈琵琶，我覺得佢彈得好叻，所以我就請佢合作，佢最初都會問『得唔得㗎？會唔會好難？』我就同佢講，新歌前奏節錄咗《彝族舞曲》少少片段，係爸爸識彈嘅，佢知道之後就放心好多，接受咗我嘅邀請！」
《低調》的MV，是Jaime入行兩年以來，最大製作的一次。身為獨立歌手，自己投資拍攝，完全是因為想同爸爸有個共同難忘的回憶作紀念，「我覺得同爸爸好難得有個咁嘅合作，加上爸爸成日同我講，要做就要做到最好，所以今次我就曬冷，基本上我將賺到儲落嘅錢，都放咗喺呢首歌嘅製作同拍MV上面，畫面同音樂上都豐富咗好多，成為咗我同爸爸畢生難忘嘅project！」新歌由T-Ma監製，Jaime與PurpleNacho一同編曲，再由Jaime包辦作曲及填詞，最後成為一首由琵琶輪子彈奏出充滿少數民族的氣息，再穿梭到現代型格的電子舞曲。Jaime笑言：「我發覺曲、詞、編、監，如果自己做晒嘅話，真係會慳好多錢，但係，依家有T-Ma幫我做監製、PurpleNacho同我一齊編曲，令我學到好多嘢，令到首歌更加立體，使多啲錢都係值得嘅。」
Jaime花了近半年時間練舞，拍攝MV當日，先於南生圍晚上取景，拍攝Jaime與舞蹈員齊齊跳舞的部分，之後在灣仔租了一間富有特色的火鍋店拍通宵，拍了足足17粒鐘，絕對認真製作；而今次MV，Jaime就找來波仔Boris操刀，今次張爸爸有份參與拍攝，媽咪雖然沒有上鏡，但就陪住Jaime父女捱通宵，鏡頭前後都充滿愛呀！
