Serrini中大英文系畢業，再修讀港大香港研究哲學博士，入行不久，她便搬出來獨立生活，「我唔認為人要受父母啟發得太多，好似宗教典籍咁講，人係要離開父母，要離開父母對你嘅期望和管制。有時他們出於愛，但你要acknowledge（承認）呢樣嘢，我可以set好一個boundary（分界線）都可以愛佢哋，我現在會同佢哋講，我脫離咗你哋喇，我唔係under你哋嘅女，我係一個愛你哋嘅人。呢種孝順，並唔係你講乜我就會聽晒你講，而係大家傾、大家討論，我覺得呢種父母嘅愛，更加成熟。」
從來不受傳統約束，也是Serrini的生活哲學，「我哋呢一代，仍然都會有好傳統嘅family，可能有好多嘢不敢同父母講，甚至乎有啲人，唔知道自己父母點認識，佢哋愛情故事係點？佢哋童年係點？我覺得如果知道咗呢啲嘢，會令你更加認識你的父母，同認識佢哋點解有啲toxic behaviour（有毒行為），有時去trace back（追溯），就會發覺原來甚麼都有原因，因為佢哋細個日子好艱難，好多兄弟姊妹一齊住，唔太敢享受生活，覺得唔會長久，父母就是來自這一個background，你就會體諒，instead of覺得佢哋係咁㗎喇，算罷啦，你就會即刻cut off個communication，我係好想同佢哋建立個love。」
問Serrini，將來會否是一個稱職媽媽？她大笑：「嘩！一個好問題！最近有啲朋友問我，有冇諗過雪卵？What！我先醒起，原來我已經唔係十八廿二，我唔知呀，我唔想自己生囉！我覺得要搵一個partner，要有一個人同你一齊湊大佢，呢個世代好fluid（易變的），我暫時冇乜興趣、冇乜刻意去諗！我會諗，一個乜嘢quality嘅老公，而呢位老公係小朋友爸爸，當然我自己都要變成一個好媽媽，我要解決自己同family一啲世代trauma（創傷），首先我想同我partner係好愛好愛大家，愛到一個位，係我哋想生一個小朋友，instead of責任或者差唔多呢個年紀要生仔呀！」
「樹妮妮」呢條女的愛情世界是怎樣？Serrini答：「我的感情世界？我覺得所有人都係朋友，而去到有啲位，我覺得more than friends，我會有少少縮！我好尊重過去每一位有過情感關係嘅人，我覺得佢哋教識咗我好多嘢，但當我愈了解自己，我發覺死喇，其實真係冇乜人頂得順我！我同佢有conflict（衝突）嘅時候，其實我唔係想發脾氣，或者買個手袋就算，唔係，我係要由個根本問題去講起，其實係好煩好驚！我會想知道對方嘅family係點樣？而導致生咗個咁嘅仔，我又要trace back（追溯）成個過程，唔好話我揀人或人揀我先。假設我係異性戀，假設一個男仔，會想搵呢個quality嘅女仔做佢老婆？我諗唔到，係咪有啲想俾我照顧嘅弟弟舉手？哈哈！」
Serrini說，入行後最活躍的時期都沒有拍拖，「過去最長戀愛關係大約四年左右，現代社會有好多唔同嘢，有啲situationship（曖昧關係）或者有啲romantic friendship（友達以上），或者有啲甚至你都唔知係乜嚟？可能只係flirtation（調情），我覺得自己同去年嘅自己，或者跟過去三十幾年都唔同咗，不斷reinvent（重新創造）自己，甚至乎最近我開始做重力訓練gym，發覺自己愈來愈man，企得直咗嘅時候，我發覺I don’t need a man maybe，又或者I’m a man maybe？」
花絮攝影：洪志富
形象：Katy Tsang
化妝：Anise Ma
髮型：York Ngan
服裝：Burberry、Stella McCartney、Isabel Marant、AJE. [Net-A-Porter]、 Shanghai Tang、Versace