方力申、黃翠如、陳煒、梁競徽、黃永幟、顧紀筠、蘇潔明、鄧達智、譚以健、邵德龍今日（21日）錄影無綫節目《拍檔廚房》，擔任評判的顧紀筠，近年已淡出幕前養尊處休，今次出山全因曾志偉的邀請，「因為綜藝節目時間有限，最初志偉叫我時，我知道阿仔有份參加呢個比賽，我就同志偉講我唔可以做評判，最後好似阿仔個期唔得，志偉要乸唔要仔。今次對我嚟講都係突破，因為我平時都戒口，但今次因為要做評判，所以咩都要食，自己好耐無食生嘢同牛肉，依家都食返，如果唔係志偉打俾我，我都唔會做，其實當中我都俾咗好多意見志偉，覺得好多可以做，但大家都要商量，要找適當時候。」
仔仔陳浚霆有份參演處境劇《愛．回家之開心速遞》，令顧老闆戲癮大發，「平時睇《愛》時見阿仔演戲，忽然自己都想演一個角色，但希望可以遇到一個好劇本，而角色又從來都無演過嘅話，都可以考慮，以我現時狀態都ok，樣又唔係太離譜，都仲可以拍。其實原本有人提議我不如去演《愛》，做返阿仔阿媽，因為戲中佢阿媽都無出現過，我覺得都ok，自己都好期待同佢擦出火花。」
陳煒近排為開拍新劇積極操fit身型，「瘦咗差不多十幾磅，因為嚟緊開新劇，飾演時代女性，想以最佳狀態示人，著衫可以型啲，主要係靠做瘦身儀器及控制飲食，但近排比較難，因為要拍飲食節目，要試食，惟有正餐分量減少。」
即將返內地開工的煒哥，有機會與老公分開兩個月，令她十分擔心，「唔好講喇，都唔知點算，不過未發生，所以唔知老公會唔會有怨言，暫時未知可以上上落落，或長駐國內兩個月，但我擔心無人煮飯俾佢食，因為之前去咗中山十日拍旅遊節目，佢食咗好多日即食麵，因為老公好深閨，但又唔識煮食，近排我已經好努力咁教佢用洗衣機同焗爐，都要教識咗佢一啲家務事，係做老婆應該要做的。」
同場的方力申和黃翠如原來兩家人早已結緣，因妹妹正在小方弟弟的畫廊上班，原本並不知情，只是小方談到才知。而小方被雜誌報道「秘媾陳曉華」令女友葉萱不滿，他當然否認，並指自己以前單身無所謂，但現在有花邊新聞會被女友誤會「照肺」，而且該緋聞已是兩年前拍攝《美麗戰場》時的事，「突然又關我事？可能最近播《逆天奇案2》，當時我做過訪問，講自己好難識圈外人，因以前的事令我底很花，因為自認底花而令傳媒乘虛而入！」小方表示報道一出便第一時間向女友「自爆」，女友最嬲是照片不夠靚，問到會否公開兩人合照放閃，他表示有諗過，但感情事向來低調，故打消了念頭。
更多現場圖輯：
