唱作女子組合Beanies成員之一的陳樂頤Geor（阿左），去年以獨立歌手身份出道，推出過《食鹽之道》及《鋼琴後的塵》，近日阿左再推出第三首自己創作的歌曲《中二式戀愛》。
過去推出的兩首solo歌曲，都是由阿左親自作曲，新歌《中二式戀愛》亦不例外，阿左除了負責作曲，還首次嘗試填詞，「始終我創作嘅歌，好多都係我親身經歷後的感受，所以今次好快有melody出現咗！不過，我竟然有衝動做埋填詞部分，係我第一次填，之前從來都未試過。」歌曲邀請了Frankie Yip編曲、Justin Yau監製。
阿左首度填詞發現，原來當自己在情緒內的時候，靈感就會大爆發，「好多字好多詞，一諗就寫到出嚟，無論曲風及歌詞，都base我當時的直接感受。」已經不再是新人的阿左，知道要更加努力，所以她希望唱出不同曲風，像今次新歌《中二式戀愛》，阿左表示：「我今次第一次以咁rock、咁型形象，去呈現我嘅solo歌！我都幾期待俾人見到新一面嘅我！」講到最令人驚訝的，一定是曲中一段近40秒的鋼琴solo，原來是阿左親自彈奏這段忘我的鋼琴演奏，可說是《中二式戀愛》整首歌的靈魂所在。
今次阿左以一個比較暗黑的形象現身，妝容與髮型都很凌亂，與過往簡潔親民的她，有很大分別，「第一次以咁極端嘅妝容呈現喺大家面前，化咗個瘀妝再抹污糟，口再吹咗少少煙出嚟，其實想帶出一個喺toxic relationship（毒性關係）受苦，同埋『陳樂頤』一個渾噩狀態！」阿左指這個新形象對她來說，是一個很大膽嘗試，亦是配合《中二式戀愛》最合適的造型。
至於MV及創作概念，阿左坦言是想在一個「中二病」的主題下，去記錄一個人失戀時的狀態及心路歷程，「呢首歌講緊一個人同一個有『中二病』嘅人拍拖，之後嗰個人失戀，當佢回想起拍拖時有幾咁辛苦，遺失咗自我價值，好唔開心嘅過程。最後，佢點醒咗自己，決定要離開負面情緒，重拾自我價值。」阿左感激MV導演Alex，放了不少心思在內，帶出「中二病」這個主題，「入面有好多件靚衫，其中一件上身恤衫、下身長裙，有一幅係寫住『普照天下』，我一睇到就覺得好啱呢首歌主題！」另外，阿左指MV要用到綠幕（背景拍攝），她表示：「想做到一個人凌空有falling或floating感覺，我拍時四肢要離開地面扮浮，綠幕呢個過程係有啲困難及攰，好多謝拍攝團隊當時嘅體諒同遷就。」
