唱作女子組合Beanies成員之一的Winky黃健怡，二月推出首支個人單曲《喵喵厭世學》、五月出第二首《初初出世學》，近日再推出第三首個人單曲《空空避世學》，半年內完成三部曲，是今年女新人中，暫時推出最多個人作品的一位。
三部曲全是Winky親自作曲及Oscar Lee填詞，今次最終章的《空空避世學》，Winky請來賴映彤負責編曲及監製，Winky說：「三首歌都有同Oscar去討論編曲監製部分，自己本身都有聽開小彤嘅編監作品，亦都好鍾意，好想嘗試揾佢合作，於是請佢合作今次呢首歌！」由《喵喵厭世學》、《初初出世學》到《空空避世學》，Winky表示：「三首歌同一個系列，都係身處同一個空間入面，第一首講一隻厭世貓；第二首歌講個主人點去面對生死課題；第三隻講隻黑膠碟喺自己世界轉呀轉，點樣去享受獨處時光。」
完成了三部曲系列，對Winky來說，像砌好一副砌圖，「由第一首歌幫副砌圖起咗個框，到第二首歌加咗好多唔同元素在內，第三首歌終於完成呢副砌圖，對我嚟講好似完成一個里程碑，好多謝Oscar一路同我去創作呢三首歌，一齊去建構呢間屋出嚟！」最令Winky開心的，下周五（30日）終於可以將「砌圖」呈現給觀眾，「嚟緊會有個迷你音樂會，可以一次過將呢三首歌唱俾大家聽，希望大家可以從我哋音樂、歌詞，去感受呢間屋入面每個角色想表達嘅嘢！」
《喵喵厭世學》是Winky與填詞人Oscar以厭世貓的視覺看世界；《初初出世學》二人再攜手，以另一個面臨死亡的角色去看世界；至於《空空避世學》的MV，一樣是Winky與Oscar合作，Winky表示今次有特別concept，「呈現咗我喺個轉盤上，好似一張黑膠碟咁不斷享受及自轉，同自己好好相處嘅時光，即使冇其他人，自己不斷轉動，其實都係一種享受！自轉未必會有很多情緒，但卻是一個很自在的狀態。」
至於今年內會否推出第四首作品，Winky大賣關子說：「暫時未有定案，因為呢系列出完，我希望可以轉換一下場景，嘗試將唔同感覺、唔同嘅Winky帶俾大家。」Winky表示，如果出第四首歌的話，希望以另一種曲風，帶出另一個面向的Winky給樂迷。
