柳應廷（Jer）的最新派台歌《月居人》的MV昨日（28日）終於面世，這次MV找來跨國界經驗豐富的CG團隊參與製作，令Jer登上月球化身月居人，而且更猶如擁有異能，令地球瞬間大爆炸！
繼《筆觸男孩憂鬱之死》及《約齊靈魂在墳墓開生日派對》後，今次《月居人》繼續以月亮作主題，Jer道：「《月居人》想帶出嘅訊息，係希望大家唔好亂咁踏入人哋嘅世界，破壞對方嘅秩序，同今年另外兩首單曲一樣，都係好想講一個月亮嘅主題，由頭到尾都係月亮惹的禍。」從過去兩支MV，以月亮wide shot，來到今次《月居人》MV中，Jer跳上了月球表面，Jer為大家介紹自己的角色：「今次我跳咗上月亮，喺MV裡面飾演一個離開咗地球，住喺月球嘅月球人，仲由地球帶咗一朵花、一隻兔仔同埋寶石上去，希望可以逃離群眾，可以喺自己世界生活。」Jer的角色留長了頭髮，「因為喺月球住咗好耐，冇人幫我剪頭髮，所以留到好長 ！另外臉上加咗銀箔，有一種沾染咗星塵嘅感覺。」
因為故事發生在月球上，所以今次MV製作都投放了很多資源在後期製作上，團隊中集合了來自香港、台灣、加拿大等地9位經驗豐富的視覺特效人才，是一次跨界國際合作，就連Jer都覺得自己變得厲害了，「我好似演緊一個識超能力嘅人，郁一郁隻手，地球就已經爆炸，亦可以擋到激光，但其實我拍落，先知原來CG嘅畫面我要去演係好難嘅，例如我要望到地球大爆炸，feel到激光槍射過嚟我要擋，呢啲全部憑幻想去俾反應。」
