一步一腳印，每下一個決定再回頭看，麥浚龍是否一個容易後悔的人？「唔係！因為幫助唔到件事！譬如話我好後悔嗰個鏡頭，我冇拍多兩take？可能會有！但我諗創作決定上，我唔會話我好後悔做咗呢隻碟，因為確實記錄咗嗰個年代、嗰一刻個心態，記錄咗我諗嘢方法，冇得去replicate（複製）返出來！正如《耿耿於懷》嗰個年代，original嗰把聲，雖然人係同一個，但二十幾歲同四十歲，嗰把聲嘅質地係唔同，所以我覺得因為有唔同事情發生，shape咗今日呢個我！另一個歲數、另一個年紀，因為睇法唔同咗，以前可能比較清澀，但依家聲音texture已經沉咗好多，甚至乎未必想再唱original嗰個key，因為唔同key，把聲感覺又會唔同！」
不同年紀價值觀轉變
最近有報道指Juno執導的《風林火山》終於上映有期，今年底12月正式見街，更有傳剪了一個長達六小時的版本，問到是否屬實？訪問當日Juno不置可否，他說：「唔係我講！」之後再補充：「固然之期待，我覺得唔同版本出現，確實亦都係啱，由first cut去到唔知幾多個cut之後，長短度不一嘅時候，有唔同版本，呢個確實係啱！我覺得呢一刻進度健康，至於幾時可以同觀眾見到面？唔止我一個可以決定到，牽涉到發行、投資方各樣！」到了上周，「發行工作室」在FB貼文表示，「眾人引頸期盼的香港犯罪動作片《風林火山》，是由身兼歌手、詞曲創作人、演員及編劇的麥浚龍（Juno Mak）所執導的第二部長片，拍攝歷時長達七年，終於盼於2025年問世。」算是最新一個官方的肯定說法。
2017年拍攝的《風林火山》，雲集金城武、古天樂、劉青雲、梁家輝與任賢齊的四億巨製，片中搭建了面積達6萬平方呎的1:1比例的銅鑼灣實景，的確令人引頸以待。問到終於見到成品上映的心情，Juno說：「我都未諗到去嗰一步，因為我嘅參與，呢部電影我都唔知睇咗幾多次，我睇住佢點樣成長，反而我冇刻意去諗，面世嗰一日，我感覺係點樣？我只能夠諗返當時拍《殭屍》，我諗我已經唔使再睇，我淨係聽到有個聲效，我已經知道電影播到去邊度，或者聽到觀眾喺某個時候笑，我就會知道去到嗰度！我諗呢個係做創作其中一個苦處，譬如一場喊戲，或者呢一場係搞笑，呢個對白我想笑，我比所有人預先已經經歷咗，我喺片場聽到覺得好好笑，你都未睇到，但到你睇到嘅時候，或者我已經唔識笑，因為呢個笑話，我已經聽咗幾萬次！做音樂都係，因為到出街嘅時候，你都唔知道，其實我聽呢首歌，我聽咗四年㗎喇，總會有一個差別！」
《風林火山》的歷程，痛苦定開心？「我覺得快樂一定居多！由《風林火山》落筆嗰一吓，其實我喺多倫多電影節，嗰時放《殭屍》，我哋由威尼斯落多倫多，我jet lag瞓唔到，當時好大嘅noise講緊，喂，其實可以有《殭屍2》喎，但我當時覺得，我想講嘅都講晒，所以我就落筆寫一個同所謂鬼怪冇關係嘅題材！」於是誕生了《風林火山》。
每個作品都有佢條命，所以現在的Juno學會自我調節，陪伴作品最重要，「做完後期，其實我工作已經完，我唔能夠因為呢首歌或者電影，佢成績好好，我就會好開心，換轉如果佢成績未如我希望，我就好失落，因為幫唔到件事！我成日都覺得，你要你嘅情緒幫到件事，套戲或者一首歌，反應不如理想，我唔會話我攤喺度唔做嘢，我好唔開心呀，因為唔應該係咁樣！佢（作品）真係有佢條命，我後期完成，我只能夠陪住佢，會去咩電影節，我盡量去陪佢，其實音樂都係，我一定會stand by！」
化妝：Janice Tao
髮型：Powder Room
形象：NiNi
場地：Rosewood Hong Kong
