唱作歌手黃明德（Dark）於銅鑼灣時代廣場對出的英皇娛樂期間限定概念店0 e:ffect Concept Store，舉行的「黃明德挑戰24小時無間段Busking之得唔得㗎？」昨日（13日）圓滿結束。Dark由前日（12日）下午四時開始，無間斷Busking至昨日下午四時，期間更獲Gin Lee李幸倪、鄧小巧、黎展峯（Andy）、曾傲棐（Arvin）、海兒（Hedy）、EG、姜檸樂、力臻、雞翼@JFFT、Calvin Sir、傑少、KKBOX第六屆校園大使、Tim、十冰、Emiko及Charlie共十六個歌手、KOL單位來撐場。
Dark表示一知道這個挑戰的消息時，沒甚麼壓力，因為覺得自己還年輕，而且十五、六歲時不時都通宵打機不睡覺，亦試過連續八小時Busking，覺得「碎料」一單，但當真正開始挑戰時，原來不是那麼輕鬆，「一開頭啲時間好似過得好快，因為一個嘉賓接一個嘉賓，輕鬆啦！但去到零晨兩點打後我開始眼瞓，EG同傑少走咗之後，中間有段時間係我自己一個人，然後就係Andy，依家諗返起我同Andy嗰五個鐘嘅記憶，我係冇乜，嗰時我喺度諗『做緊乜嘢？我係咪發緊夢呀？究竟我喺邊度？』好似失去清醒狀態。」雖然記憶模糊，但他十分感激Andy，「佢零晨五點嚟到，買咗好多嘢食俾我，好有義氣同我捱咗五個鐘，好多謝佢。」除了Andy，他亦感激壓軸來陪他度過「最後時間」的師姊Gin，「師姊Gin特登沖蜜糖水俾我，佢親自調較溫度，真係好多謝佢，好sweet！」
Dark續說：「期間唔知係咪緊張呢，個胃開始唔舒服，胃抽筋，但真心覺得自己一定要完成佢，唔衰得，最後順利完成挑戰！唔知係咪同星座有關呢，因為獅子座有『不甘心』底蘊，當經埋人同我講，話可以放棄時，我就喺度諗放棄都幾難睇，完成唔到唔甘心呀！我一定做到！要撐到最後！」除了胃抽筋，失聲亦令Dark十分困擾，「因為之前病咗，咳得太多失咗聲，開始呢個challenge之前啱啱好返少少，加上我平時講嘢好唔愛惜聲帶，唔去control自己去叫。經過今次之後，小巧、Hedy、Calvin Sir同埋Gin，所有人都同我講『你講少啲嘢啦、你靜啲啦！』Arvin都叫我『其實你講嘢真係唔使咁大聲！』亦因為失聲，令Dark有一番新的領悟，「唱歌係我由細到大，唯一一樣覺得自己係good at嘅一樣嘢，但突然間冇咗，令到我覺得就算你幾依賴，總有一日會冇，即使嗰樣嘢好似同你出生入死。」
Challenge難關一一捱過，Dark謂倒數最後一小時是最興奮，「其實去到第二日最後兩、三個鐘，已經開始有啲唔捨得，見到條街企滿晒人嚟支持，同埋有十幾個fans真係喺條街陪足我廿四個鐘，真係好多謝佢哋！到最後一個鐘，見到一直擺喺度嘅計時器得返『分鐘』嗰邊有數字，我由心而發叫咗出嚟！終於得返五十九分鐘！最後嗰十秒，大家一齊倒數，當個鐘跳到零，嗰刻真係有啲想喊出嚟，估唔到咁多人陪住我，亦都估唔到自己感受咁大、咁感觸。」問到完成挑戰後，最想做甚麼？Dark即謂：「第一時間最想同fans影相，影完相就pack好晒啲嘢，嗱嗱臨返屋企瞓覺，我好掛住屋企張牀。」
