TEAM WANG design的共同創辦人張權（Henry），是王嘉爾（Jackson）的中學同學，現在一起為品牌打拚，兩人創立的TEAM WANG design，今年首次與新加玻聖淘沙合作，在環球影城萬聖節打造鬼屋《Under The Castle》，成為首個進軍環球影城的華人IP。
在旁的Jackson插嘴：「我經歷過嘅，我諗邊個經歷都會destroy（被打垮），唔係有乜特別驚天秘密，正如我講，只係人性利益和現實，令我認知咗好多，所以呢個並唔係一件壞事。」Henry補充：「好多時候係唔撞板唔知嘅，細個成日叫唔好飲咁多汽水，到蛀牙先明白呢個道理。」Jackson哈哈笑說︰「唉吔，講咁多咁掃興，不如唱返首Dem beat！」Dem beat（Demonstration of beat）是香港校園文化，意即拍手腳踏地大叫口號，可見Jackson仍有熱血少年的一面。
頂流也可以入世貼地，問Jackson有沒有留意香港樂壇新人？他口快快就說︰「最近有隊UNi嘛！（港產新女團UNi，近日的現場演出片段被網民瘋傳恥笑）」認真？原來Jackson有留意林家謙，他說：「《是但求其愛》好聽！」
問Jackson有沒有考慮出首廣東歌？他笑說︰「我唔知呀！上次我唱咗學友老師首《分手總要在雨天》，之後俾人狂話我嗰啲咩音，咩咩咩咬字唔正！喂，我依家播新聞咩？聽得明就得啦，所以，唉，唔知呀！」不過Jackson都有計劃回港「做啲嘢」，他表示：「想下年，一直喺度睇緊，我係想返嚟嘅。」
其實Jackson早就踏過紅館台板，一九年驚喜擔任鄭秀文演唱會嘉賓，想不到只隔兩年，Jackson已先後三度登上全美最大音樂節《Coachella Music Festival》，演唱《100 Ways》、《Cruel》與《Blow》等歌曲，成為首位登上這個國際大舞台的中國solo歌手。Jackson謙虛地說：「到依家每個舞台嘅演出，個個都好深刻，就算下面幾多（fans）都same to me，我都好開心，我仍然享受舞台，喜歡表演、喜歡entertain觀眾。」
Jackson不止是歌手，他的名字更經常穿梭國際時裝品牌，於二○年成立的TEAM WANG design自家品牌，他親自擔任設計師，對他而言，TEAM WANG design已經不止是一個品牌，他說是關於know yourself的態度。「嚟緊TEAM WANG design除咗時裝，呢一、兩年比較focus《Under The Castle》呢個IP發展，上年喺上海已經做過，今年都會喺上海再做。今年首次同Universal Studios聯手策劃，之後呢？除咗本身嘅apparel會繼續推出外，我想用這個品牌專心做漫畫和animation。」
剛剛推出首本漫畫書的Jackson，自創的兩隻角色PUMPKIE與SPOOKIE亦面世，特別鍾情萬聖節的Jackson解釋︰「因為由細到大，萬聖節對我來講，係一定要celebrate嘅gathering，好exciting一個回憶，十五、六歲就去海洋公園，我成日同Henry去玩鬼屋，肯定唔係剩得我哋兩個啦，係約咗當時鍾意嘅女仔，去Halloween係一個date！」個date成唔成功？Jackson笑說：「我依家咁，你話成唔成功？哈哈！已經冇咗聯絡，唔記得邊個嚟啦！」
與Jackson同樣今年三十而立的Henry，則已經成家立室，問Jackson有沒有心思思？他斬釘截鐵：「冇！每個人個timing都唔一樣。我都會結婚、我都係人，有plan過諗住三十五歲之前囉，如果另一半願意生BB，我希望可以睇到我個小朋友耐啲，而且我認為每一個行業都唔會有盡頭，每個人標準都唔同，最緊要自己清楚，咁就做囉！我都想快啲㗎，每一個timing都有應該要做嘅嘢。」
至於劍擊的timing，Jackson坦言已經過了，「我仍然有留意香港劍擊，十分恭喜家朗和Vivian（江旻憓），我自己有冇懷念？懷念冇用啦，too late！今年我去咗仲滿（○八年奧運劍擊冠軍）北京的劍館玩吓，依家打呢，記憶仲喺度，仲有muscle memory，打嗰陣覺得自己速度仲好快，以前個感覺好似返咗嚟，但之後睇返片，嘩！點解咁慢嘅？原來自己個身體已經反應唔切。」
劍擊於Jackson而言，是充滿人生學問，「除咗技術之外，從中可以學到點樣做人，我一直都認為劍擊好似moving chess（下棋），好考心理，對人生方向好有幫助。」
化妝︰Simon
髮型︰Han Lee
形象︰JC & JUN
服裝︰TEAM WANG design
