黎瑞恩《V Union恩賞．演唱會2024》昨日(20/10)來到尾場，一身女王打扮的小恩子獻唱第2首歌《多情》時已被感動，她說：「點解咁快想喊？大家唔好整喊我，我仲要唱。」收拾心情更搞笑話自己以前做「玉女」，現在都是，「冇肉點做『肉女』？」
第二晚繼續有黎瑞恩和女兒Sheree以粉紅孖公仔姿態現身，伴隨超過20位舞蹈員唱跳《心急人上》和《美少女戰士》，合拍程度更勝第一場，贏得全場掌聲。黎瑞恩表示：「囡囡發覺原來做歌手好辛苦，要記歌詞和舞步，雖然好喜歡唱歌跳舞，不過唔會出道，都係做返同而家讀書有關嘅職業會舒服啲。」緊接黎瑞恩邀請兒子一同到台上，三人一同跟台下觀眾大合照，仲叫兒女同觀眾打招呼，叫「哥哥姐姐」。
來到安歌環節，黎瑞恩表示：「有幾多次encore就睇下大家叫得幾大聲。」她笑言隔籬飯香，喜歡唱其他人的歌，所以歌迷點的歌她今晚都唱給大家聽，《愛你會是多淒美》、《豐彩依然》、《等到今夜》等。當演唱《雲上的日子》時，黎瑞恩感動萬分，「過了咁多年大家仲對我咁好，仲咁支持我。今日唔知聽日事，唔知仲有冇機會同大家唱歌。今次演唱會的歌單我好喜歡，希望喺你哋嘅生命裏面，曾經有呢個演唱會出現留下印象。」
黎瑞恩鼓勵大家將買花藍的心意轉化為愛心善款捐款予「快樂港仁」，10月是世界中風月，是次捐款幫助中風的病人可以接受免費針灸治療，造就更多健康快樂香港人。是次演唱會一共籌得20萬善款。
騷後小恩子受訪，她說與女兒同台合唱是機緣巧合：「女兒最近返港度假，佢喺屋企陪我練歌時，啟發我諗到呢個表演，其實佢愛唱歌、跳舞，曾提出想參加歌唱比賽，但我堅持要佢完成學業再講，今次算完咗佢同我心願，仔女𠵱家更明白做藝人壓力大，變得更崇拜我，我個仔就冇興趣入行。」