第39屆華鼎獎昨晚（23日）於澳門舉行，去年憑《不日成婚2》首次獲香港電影金像獎「最佳女主角」提名的衛詩雅（Michelle），憑電影《破·地獄》獲得今屆華鼎獎「華語最佳影視女演員」；方中信則憑電影《金手指》於第三屆澳淶塢五大洲電影節金莉花獎獲得「全球最佳男配角」獎項；而石修及歐陽震華則受邀擔任「全球最佳男、女配角」及「全球最佳女演員」的頒獎嘉賓。
近年屢獲電影獎項提名，這次得獎，Michelle謂自己非常激動，認為無論任何獎項，對她來說都是一個肯定及被看見的機會，「呢個獎對我嚟講太重要啦！對演員嚟講係一個肯定，亦都提醒人哋『我仲喺呢行㗎，大家可以搵我演戲！』憑《破·地獄》呢套電影得到嘅獎項，代表大家好喜歡我哋電影，所以好開心。」問到會否增加來屆香港電影金像獎提名的信心，她坦言：「感覺會實在啲，信心高咗嘅！」
電影《破·地獄》中，Michelle飾演一名救護員，她表示這個角色，無論在體能及心理上都有很大發揮，「心理上就係大家睇過呢套電影就會明白嗰種沉鬱，長時間培養沉鬱情緒，每日同屋企人好多矛盾、好多爭吵，所以嗰段時間係難過嘅；體能上除咗要練一啲儀式上嘅嘢，亦都要做好多體能同體力瞓練，因為角色係一個救護員，自己對呢方面要求比較高，好希望最貼近個角色，所以嗰一刻開始，我每日都去做gym，嗰段時間體能真係幾好，同埋大隻咗好多！經過呢啲瞓練，之後我真係可以『秤」到個人上救護牀。」最難忘的是跟許冠文拍攝一幕洗澡戲，令她學到何謂敬業樂業，「Michael神戲入面飾演我爸爸，有一場戲我要幫佢沖涼，我記得拍攝時候係冬天，好凍，所有劇組都擔心，佢反而話『唔緊要㗎，你哋拍到OK先』，佢為我哋嘅畫面、劇情需要行先，好唔錫身，我又心痛，覺得好深刻又覺得好犀利，好尊敬佢，喺佢身上絕對學到乜嘢叫做敬業樂業。」
至於方中信亦表示十分開心，他謂獎項並非屬於他一個人，而是整個拍攝團隊，是大家一起努力的成果。他謂最難忘是一場戲中，他被殺後伏屍泳池的拍攝，「我記得拍嗰陣時係冬天，其實都幾凍，我要趴喺水面，啲水喺鼻湧入去，呢樣嘢辛苦啲，我都著咗潛水衣打底，其實都OK，問題不大！導演佢哋都好好，安全措施做得好好，搵咗兩個潛水員喺池底Stand by，放晒啲氧氣樽，好安全，但要孭住啲鉛帶，因為要做到半浮沉效果，恐懼就冇，因為我都有潛開水，唯一係驚個假髮會甩，哈哈！」
