麥明詩今日出席活動，挺了巨肚現身的她原來懷孕約五個月，她接受傳媒訪問時難掩興奮，「我有同朱千雪食飯取經，佢教咗我好多嘢，例如小朋友嘅物資點安排，有什麼重要什麼唔重要，佢啱啱行過成條路，畀咗我好多貼士，點樣應付四大長老嘅關係，幫到我好多。」麥明詩還笑說可以跟朱千雪的小朋友對親家。
麥明詩指懷孕初期很易攰，又有孕吐，胃口變差，直至現在穏定了才做運動及游水，又說作為一個準媽媽，同時要兼顧身體及工作，對她來說是一個大挑戰。麥明詩還透露老公對自己呵護備至，常氹她吃東西，好鬼冧，「佢會炒隻蛋、預備啲yogurt畀我，不過，可能佢比較高大，BB嘅體型都較大，所以個胃好易頂住，唔可以食太多，小食多餐。」
雖然陀住B，但麥明詩已計劃12月一家人去旅行，「相信BB出世後，就冇咁靜，同埋大家都會好忙，想珍惜同父母嘅時光。」家中有4大長老，問BB出世由誰照顧，她笑言：「老爺奶奶已經有3個孫，不過都樂意幫手，媽咪就非常開心，已經幫我請埋工人姐姐。」至於BB的名字，麥明詩大賣關子說︰「而家諗嘅都係搞下笑，啲名唔出得街！你哋諗下，我老公姓盛。」