無綫台慶舉行，近三百藝人齊齊列陣為TVB慶祝57歲生日！亮燈儀式結束之後，Liza姐汪明荃為開場騷打開序幕，然後一眾藝人由上世紀70年代TVB成立之初，跟觀眾回味這57年來無綫所創造的各大經典之作，如《歡樂今宵》、武俠劇系列、《獎門人》系列、《香港小姐競選》系列、《聲夢傳奇》同《中年好聲音》系列、《皆大歡喜》及《愛回家》等處境劇，陪伴了無數香港觀眾成長。
今次台慶主題是「回家」，無綫邀請了吳啟華、廖偉雄及盧海鵬「回家」共慶，有盧海鵬自然有試咪，大夥齊齊叫鵬哥試咪，鵬哥即席講咗「盧海鵬試咪 扮嘢冇走雞」，然後大家又起哄叫燦神及鵬哥唱返佢哋嘅拿手金曲，建議唱《幾許風雨》，鵬哥話唔識唱羅文版本，只識唱自己版本《幾許瘋語》，然後哼唱！掀起高潮！
原來鵬哥同廖偉雄都係十一月生日，大家捧出壽桃蛋糕為二人慶祝！司儀問鵬哥開心嗎？他講：「開心到要依家用拐杖來行路！」好鬼幽默。
