古巨基日前受邀為香港半島酒店的聖誕亮燈儀式作特別嘉賓，除了亮燈儀式外，更「應節」地演唱《White Christmas》及《Santa Claus Is Coming To Town》兩首經典聖誕歌，提早與現場的VIP迎接聖誕。
提起聖誕燈飾，古Sir回想中學時的聖誕節：「我會約同學由沙田屋企出尖沙咀睇燈飾，每次經過半島酒店，都覺得好似一座擺滿藝術品嘅博物館，經過一定要喺門口噴水池影相打卡；轉眼咁多年，冇諗過有一日能夠喺呢度唱歌，仲係一啲咁classic聖誕英文歌，覺得真係好微妙。」
原來今次表演，囝囝Kuson、古Sir爸爸媽媽和外父外母都一齊捧場，Kuson好興奮，一邊睇仲一邊大叫爸爸個名。問到今年會買甚麼聖誕禮物給Kuson，古Sir話：「今年應該會送關於九大恆星嘅圖書同埋玩具俾佢，因為佢最近好鍾意關於星球嘅嘢。」
問到會唔會教Kuson唱聖誕歌，古sir就表示：「佢睇完我今次表演之後，佢問我『爸爸，點解你唱咗我要喺學校表演嘅聖誕歌呀？』原來佢之後要喺學校表演《Santa Claus Is Comin’ to Town》，呢兩日我哋兩父子久唔久都一齊練歌。」