丁子朗今次擔任節目《一個香港．十種玩法 過節篇》嘉賓，到訪香港夜遊地方，更到訪酒吧，即被江美儀笑指蒲精一名，去到每間酒店都識人，「今次最開心係公司俾錢飲酒，平時要自費，其實我平時好少去蒲，都係去清吧地方，朋友帶我去，見識下世界，唔想過咗30歲先出嚟見識嘛，不過就好少會飲醉，飲醉就飲唔到杯嘢嘅精髓。」
對於自己憑劇集《你不是她》有份角逐「最佳男主角」及憑《萬千星輝頒獎典禮2023》角逐「最佳男主持」，「其實第二次入圍角逐視帝，我有上網睇到好多網民有好多問號，其實我自己都有問號，可以入到十強，只係我好彩有套劇做男主角，自己入咗圍都就當贏，無咩期望，不過因為上年做頒獎典禮主持，而今年有機會坐低觀賞都係開心，自己反而對角逐男主持有信心，雖然對手都好強，但既然公司對我有信心俾我去做，我點都要有信心，所以呢個提名對我更加有意義。」