被其他Youtuber指黐黃日華入明星足球隊的伍仲衡，身體力行於昨日（24日）首次跟明星足球隊練波，但被老婆拍下他踢到抽筋的片段放上網。中學時踢學界司職右翼已有廿多年沒踢波的伍仲衡，現時體重亦升至逾200磅，被華哥嘲說：「咩叫做太興奮呢？叫佢慢慢踢㗎啦，係咁放盡，實抽啦！」隨後他再上載在球場的片段宣布「掛靴」，笑壞身邊的隊友！
伍仲衡又更新社交網以文字交代其狀況，留言：「平安夜本來諗住出去拍拖睇燈飾，由於我突然行得慢過隻烏龜，節目改由在家裡接受伍太腳瓜Long按摩推油治療，今晚要不停加鐘，祝大家聖誕快樂」、「我由房行出廳，用咗1分鐘，今晚覺得屋企好大」。
