鄭裕玲率先探訪家姐細佬　大熊貓龍鳳胎2.16公開亮相

香港海洋公園大熊貓盈盈自誕下龍鳳胎「家姐」和「細佬」後打動香港民心，園方日前發放已5個月大的家姐和細佬到外場遊玩片段，隨後宣布兩隻小可愛將於2月16日開始可以同大家見面！

不過Do姐鄭裕玲今日（23日）率先曬出到海洋公園探訪正在外場熟習環境的家姐和細佬，開心留言：「多謝海洋公園邀請，率先探訪家姐細佬！」Do姐貼上隔住透明幕牆跟家姐細佬合照外，還拍下家姐和細佬爬樹，背脊印有紫色「豬仔印」的細佬踩住家姐成功上樹片段，超級可愛，令網民大嗌：「實在太令人羨慕啦」、「太羨慕Do姐你哋，率先見這對可愛熊貓家姐同細佬，太cute」。