邱禮濤（Herman）永遠難以被歸類，獨沽一味永遠不會出現他身上。多年來他的電影世界天大地大，由87年執導《靚妹正傳》開始，從影36年來都估佢唔到，有《人肉叉燒包》、《伊波拉病毒》被封cult片王、轉頭就《陰陽路》系列、又有講少年犯的《等候董建華發落》、連性工作者的《我不賣身·我賣子宮》都有……近年的邱禮濤，愈拍愈大製作。
最新出品《掃毒3：人在天涯》下周香港公映，大陸上映未夠一個月已收近三億，上次第二集在大陸票房更有13多億，面對票房壓力，邱禮濤說：「始終喺呢個行頭好耐，叫做好又好過、衰又衰過，我諗睇得開啲係好事。票房好，好似好市儈，但係多人睇梗係好，你拍戲都係俾人睇，唔係擺屋企自己睇呀！」
邱禮濤有一樣比較易歸類的，他絕對是個超愛音樂的rock友。一頭長髮，訪問當日就穿上搖滾天團Joy Division的tee，他身邊圍繞不少真正玩音樂的人，當年曾為竇唯、唐朝等人拍下《中國搖滾樂勢力》紀錄片。問邱禮濤，有將樂與怒精神放在電影嗎？「你個人係點樣，套戲就會有！唔使專登，反而你唔係嗰種人，你先要諗呢個問題！我係rock友，所以我要擺啲rock嘢落去，你要咁樣諗，你就唔係rock友！」
電影圈有個傳聞，不要被邱禮濤的憤怒rock友外表誤會，他在片場其實是個謙謙君子，從不爆粗發脾氣。向他求證，「呢個假嘅！梗有啦，我話冇都係呃人。我諗比起第二啲人少，所以你講一聲，大家就知道好嚴重。你做導演一日炒蝦拆蟹，大家聽慣咗，愈講啲人行得愈遠，我唔出聲黑起塊面，個個埋嚟同我解決問題。」
一直拍大製作未必好事
《掃毒3》今次集齊三大影帝古天樂、劉青雲和郭富城，邱禮濤與前者合作無間，「我都唔記得幾多部，總之肯定超過十部，大家都熟！」溝通默契完全冇難度；反之與城城郭富城，倒是這麼多年的第一次，「郭富城第一次合作都OK，當然有個磨合過程，拍攝環節正常去講個劇本、角色，你話戲分平唔平均，搞劇本時希望佢三個將來片裏面，曝光率平均，冇理由搵佢哋嚟做配角，at least作為一部商業片marketing上，平均啲係好啲！」三位阿哥平分春色，唔使拗！
拍片出名快靚正的邱禮濤，懂得為老闆控制成本的他，今次拍攝有極多大場面，又槍戰又爆破，他笑言：「呢次可能有（超支），實際數字我都唔知！」單是泰國外景撞正疫情封關，到打算移師雲南再變惠州，又遇上大陸動態清零，最終決定在香港流浮山搭景，成為片中重要的村寨，「我覺得（流浮山）都好犀利，好大呀嗰幅地。其中最貴，觀眾未必睇到，就係要移開啲泥鋪地最貴，鋪地都鋪幾百萬，唔係話要殺好多樹木，我哋冇話要劈樹開幅地出嚟，但係幅地岩巉，所以你要打返平，先可以再搭建築物。」
近年邱禮濤拍片愈來愈大製作，外界看來當然是件好事，他卻說：「如果一直大落去，我覺得唔好啦！」邱禮濤從來不想被定型，所以他的片種從來多變，「拍啲大、拍返啲細就好！一直加大落去冇意思呀！如果調轉我係老闆，我都唔會不斷加落去，有時唔可以為個scale而加大，始終係睇需唔需要，呢個係個人意願，譬如我拍完一部警匪片，我希望跟住拍愛情片，但未必碰啱有老闆，第二個老闆又係叫你拍警匪片！」所以之後可能繼續《掃毒456》？邱禮濤笑回：「我唔知呀！呢啲睇老闆，做生意有自己考慮。」
考大學最想讀醫
邱禮濤1987年執導第一部電影《靚妹正傳》入行，做導演前一直幫黃泰來的電影掌鏡，他視黃為師傅，「黃泰來、查傳誼同麥當傑有間拍電視劇嘅公司，我有幫佢哋手，冇攝影師開工呢，我就攞起部機，變咗我拍，後尾黃泰來拍電影就搵咗我做攝影師，商業電影第一套就係《英雄好漢》，跟住《三狼奇案》、《我在黑社會的日子》同《法內情》！我第一部戲就唔關佢事，嗰時我有拍過短片，會去參加香港獨立短片展，有人睇咗就搵銀都做老細，開始搞《靚妹正傳》！」
那時的邱禮濤才25歲，已有機會做導演。畢業於浸大傳理系前，他在理工讀放射治療，原來邱禮濤一直想從醫，「細個諗好多嘢，考大學諗讀醫，不過預科嗰兩年，逃學率太高，一年一百日返學，我六十日冇返！以為有啲小聰明，因為會考考得幾好，預科原來真係追唔到，我都有考中大，但真係好好笑，我中文攞H，中大中文唔合格，乜都唔得，嗰年係中大第一年開醫科，醫科入唔到，理工Radiography都係醫療嘢，日日返到學校，又行返出去紅磡碼頭，或者走去睇戲，又係冇返好多日學，解剖Anatomy真係好悶，好多名要記，我又搵啲理由俾自己去（走堂）！」
名副其實反叛青年，邱禮濤說：「見到John Lennon死，一個月唔做嘢、唔讀書乜都唔理，哀悼下John Lennon，過咗一年，咁點呢？過完農曆年就報浸會傳理系，最初諗住讀新聞系，讀完一年傳理系之後，發覺自己真係好鍾意電影，二年班就改讀電影。」
亞視實習做PA認識秋生
很多人以為邱禮濤與黃秋生的淵源，因《八仙飯店之人肉叉燒包》而起，其實兩人相識於更早期的亞視年代，「我喺亞視做PA係暑假internship（實習），一千蚊人工一個月，即係車馬費，嚴格唔可以話係一份工。我實習時候識秋生，實習完就返學，我哋要拍片交功課，總之諗到故仔我就拍，部短片十幾分鐘，開頭叫《半邊情》，拍完之後叫做《惘》，戲入面秋生做個舞台劇導演，搞緊個舞台劇，故事靈感來源芥川龍之介小說，期間喺公園見到個女仔畫畫好吸引，但係佢哋冇傾過偈，後尾個女仔突然間冇再喺公園出現，然後佢見到一段新聞，睇個形容有個女仔死咗，佢以為就係嗰個女仔，然後佢自己就自殺！」聽落都好cult，秋生當年演技如何？「隔成幾十年，我冇睇過啦，我梗係覺得幾好，條片都失傳咗！」
通常說，要認識一個人，看看那個人身邊的朋友是誰，你大概知道他是那類人。物以類聚。邱禮濤說，有些演員，只限拍戲時接觸，絕對不會私下約出來食飯，而至今仍會約出來食飯傾偈的，除了黃秋生，還有黃子華。「秋生、子華，識咗好多十年！黃子華第一個可以叫做佢嘅楝篤笑，當時仲喺城市當代舞蹈團，85、86年得200幾人個場地，佢同黃碧雲，寫作個黃碧雲呀，一人做一半，嗰陣我哋就識，我哋到依家都係唔工作但會見面嘅朋友！」
說起當今的子華神，邱禮濤舉了一個例子，「佢其實幾有決心，大家覺得佢可以寫嘢嘅時候，佢就係你搵我寫嘢要俾我演，《神算》都係咁，佢同Michael（許冠文）去南非寫劇本，佢問係咪俾個角色佢，呢個係佢嘅條件，等如史泰龍寫《Rocky》出嚟，你要個劇本就要我做，荷李活個世界就唔會偷你嘢嘅，好似George Lucas好多呢啲故事，佢拍《Star Wars》唔要片酬，但係我要裏面所有character嘅玩具版權，作為一盤生意George Lucas係好勁，佢最賺錢係玩具呀，唔係套戲，套戲係拍嚟宣傳啲玩具。」
場地提供：K11 Art House
