影帝周潤發今日出席《「香港‧晨」周潤發慈善攝影展》，過百粉絲一早圍在商場一樓二樓欄杆，等待發哥的出現。
主持人方健儀以「上得山多遇發哥」介紹發哥出場，發哥即攬攬問好，活動中，發哥逐一剖析作品展主題：「香、港、晨」，自認對中環有情意結，事關第一份工就係喺中環做Bell Boy，仲感觸良多咁話：「我真係好愛、好愛香港！」
說到今次相展中，有一張攝於中環畢打街的照片最令發哥印象深刻。那天下雨，街上行人稀疏，此時有一位衣著優雅的女士行過，她的裝扮與背景配合，發哥就抓住這瞬間即逝的機會按下快門，成就出他非常喜歡的一張作品。發哥更以攝影比喻人生，說人生際遇亦不可強求，好機會與好照片都需要天時地利人和，享受當下最為重要。
被問到是否刻意在作品當中入鏡，他說：「有一批相我係入鏡，我特登咁樣影，將自己融合喺社會，融入咗喺個環境度。」講到會否為發嫂影相留念，他笑言：「如果影得唔好佢會鬧。」當追問下次會否找發嫂做主角，發哥搞笑答：「冇人買喎啲相！」大家起哄建議他可以全部買下，發哥聞言即答：「哈哈哈，咁會傾家蕩產。」他又指當中一幅剛巧拍下天星小輪三艘船同框，認為：「天衣無縫，冇得頂！」慈善攝影展中30幅作品，最貴一張標價是二萬八千元，而扣除支出將會全數捐給慈善機構。
發哥說最近接拍內地電影《唐探1900》，新片將會在農曆年在內地上映，「我都好多年冇拍啦，上一套《別叫我“賭神”》到現在《唐探1900》，我哋咁嘅年紀好少搵角色俾我做。」他稍後會到內地宣傳，屆時亦會帶整拍攝裝備影靚相。
