上周寫「麻煩」，應擊中不少朋友的穴道，或麻或痺或痛，連環電郵擲來力陳個人經驗者不吐不快。
「好的感情是互相麻煩出來的」，大家很同意，但叫讀者們最激心的，是「麻煩別人，要有分寸。接受了別人好意，定必感恩。」誰身邊沒有三五個 abuse 別人善良，幫你近乎奉旨，過後冇影的「不是朋友」？
大概本人可被麻煩的範圍比較「多元化」，日常被欺凌的密度甚高，加上我和陳慧都是「老襯底俱樂部」正副會長，狠狠推辭好似太絕。（朋友說我需要經理人）
年中不乏大集團領導，上市公司主席、國際大企業 CEO 之類，在一些場合認識了，或透過朋友有心結識，之後相約吃飯，說希望找我談談他們的品牌呀、業務呀、科技網路上有什麼創意點子。「你咁多橋，醒幾條我」或者「唔使用你好多時間，我有幾個 powerpoint （ppt 每個過百頁）你睇晒佢俾啲意見我……」下刪一地恭維廢話，警訊說騙徒的手法層出不窮。
我是從事創作的，是我的專業，點解我要免費送你？你賣樓賣機票賣電器，又唔送樓送機票送全屋家電給我？
「幫吓我」。幫？有需要的人，可以免費幫，做善事；朋友，幫得，也視乎情況交情。你約我食飯，相識談話總共未超過三小時，點解要幫你，而你財雄勢大，員工無數。
年輕時，會被糾纏，太禮貌，一些老江湖或縮骨精不易罷休；年長了，就說要報價，報個實價，有些知難而退，有些仍然死 lur。「好易之嘛對你」。我舊上司常說「咁易，你自己諗囉」。
有多年冇聯絡朋友找我幫他朋友的食店改名。我說，你的店我或許還可以考慮，你朋友係邊位？
更多日常從不聯繫，是面書朋友也未有 like 毛一條，忽然連 like 你幾個 posts，我就知實冇好嘢。然後，找我寫序。又到書展了，最怕。寫完，會否立即陌路？你話呢？