鄧兆尊證老竇祥哥愛賭錢 爆曾一夜輸掉20層樓

鄧兆尊前晚（17日）在跟吳家樂、江美儀主持的網台節目《娛樂好好玩》中提及內地瘋傳「超一線男星澳門賭輸10億元」，隨後公安部查明一網民為博取流量，用AI製作假新聞被捕一事，兆尊亦大爆父親新馬司曾（祥哥）生前亦曾豪賭，於60、70年代曾一晚輸掉400萬，在當年可買20層樓。
在討論娛樂圈誰喜歡賭錢時，兆尊謂：「上一輩應該好多」，江美儀即指一定首推曹達華，輸掉一個片場！家樂問兆尊曾有傳祥哥愛賭錢？兆尊亦謂：「我老竇梗係鍾意賭啦！」1967年出生的兆尊透露小時候在祥哥房間的大牀上，見過有一疊疊高過現在的手機的$500元紙幣，一個U字型圍住張牀，但只圍了一晚，第二晚錢全不見了。家樂說：「咁你有冇問爸爸個U字型…」兆尊即舉起手掌說：「唔好提！唔好問！」更笑學着當時老竇的表情，翻白眼摔手指，形容當時祥哥「眼坦坦」。兆尊續謂父親當年愛賭牌九，但不知在哪裏賭，只知一晚就沒了。他估計一疊錢起碼20萬元，一疊可買一層樓，共有十幾廿疊。

兆尊稱只此一次，再沒見牀邊圍住錢；問到祥嫂應該也會出聲？兆尊說：「嗰次之後我阿爸冇出過聲，我阿媽喺度大家都冇出過聲，咁高殺氣喺度，我哋邊敢出聲，靜雞雞坐喺度睇戲，剝住花生，『仲未出事嘅』！」他又謂之後祥哥已少有賭錢，並爆祥哥曾是一個賭場的股東，每個月都有分茶錢，他記得80年尾，曾幫祥哥去攞錢都有幾十萬，每個月貼士可分廿卅萬。
兆尊自言沒遺傳父親的豪賭基因，但年輕時也曾賭過，他說：「同朋友去澳門玩賭過，試過為咗追輸咗嘅2萬幾蚊，4、5個朋友攞咗50萬籌碼，諗住快手快腳追返2萬幾蚊算啦，點知我朋友追到俾返晒啲籌碼我，我揸住50萬，覺得追2萬幾蚊好易啫，2萬唔得4萬，4萬唔得就8萬，但當輸到8萬就震晒，自從嗰次輸晒，之後就好少接觸呢樣嘢。」

兆尊繼而表示曾有幸跟曹達華拍過戲，也曾問過曹達華輸掉片場的傳聞，曹達華當時也有告知他：「香港唯一一個得到何生俾張VIP卡我，可以任食任住嘅」，可想而知對方輸幾多。兆尊隨後又爆曾見過「大哥大」攞幾篋入馬場；江美儀就曾經在美國登台時，有主辦商跟她說，曾經有女歌手到該場唱歌，都未開騷就輸掉歌酬還要倒輸，但她堅拒透露女歌手是誰。
江美儀亦爆當年謝賢拍戲經常將手放背後原因：「原來Roll機前佢同啲工作人員賭緊牌九，唔想將牌九擺低，人哋咪知咩囉，或者調你牌，所以佢揸住副牌九，啲褲又窄放唔到落褲度會見到牌，所以佢（一隻手）揸住放喺後邊，然後（另一）隻手咁做戲囉！」

另外，江美儀在節目開始時，談到前老爺夏春秋（冬叔）離世，她表示當日是看到吳君如在社交網公告冬叔死訊才知，但她說：「當然啦，我知佢呢幾年身體麻麻地，因為個腎唔係好舒服，一個禮拜都要入醫院兩次洗腎。」她說久不久都會跟前夫吳君祥問候冬叔狀況，都說冬叔在家休息多，坦承之前她跟冬叔關係不錯，她與冬叔同月同日生，冬叔細新抱亦是9月生日，所以當年他們三人會一起慶生。