憑電影《淪落人》家傭角色奪得2019年金像獎最佳新演員的菲律賓裔演員的Crisel Consunji，能演擅唱，她昨晚與同樣王梓軒、胡渭康、Sean Oliver等，在灣仔會展演出《音樂劇的奇幻旅程》演唱會，薛家燕也有抽空捧場，演唱會中安排了唱出不少動畫歌曲，所以有不少家長帶着子女來欣賞。
Crisel早於3個月前才誕下B女，坐月後即投入綵排，為了這次演出，她紮肚收身，在台上展示弗爆身形，穿着不同造型靚裙，加上悅耳歌聲和舞蹈，令觀眾眼前一亮。王梓軒早已預告會拉奏小提琴，大騷音樂才華，後段又用英文Rap長約5分鐘的歌詞，完全沒有「𦧲脷」，為觀眾帶來驚喜。胡渭康首次參加音樂劇演出，但他與其他表演者都十分合拍，表現淡定。
台下的家燕姐看得非常投入，不時隨着節奏拍掌支持，她完騷後更跟Crisel、王梓軒、胡渭康合照互動，並大讚所有表演者演出精彩：「呢個騷真係好睇，近年少見，真係好magic。佢哋唱咗好多外國經典歌曲，其實香港有好多有水準嘅表演者，又唱又跳，我坐台下都有衝動上去玩埋一份，我唔睇就真係損失！真係要做多啲呢類騷，咁香港樂壇就可更加國際化。」家燕姐表示Crisel演技無庸置疑，但歌藝原來同樣出色，「佢把聲靚到不得了，我好鍾意佢把聲。我仲想遲啲搵Crisel做我音樂老師呀。今晚佢換咗好多靚靚造型，直情係舞台個queen。」Crisel聽後開心不已，笑得合不攏嘴，她不停說多謝，對於首晚的演出，Crisel仍未滿意：「我俾自己80分喇，餘下兩晚，仲有進步空間。」
胡渭康感謝家燕姐對音樂劇團隊的加持，笑言想邀請她上台跳「十字步」。這次演出，他與團隊都經歷不少困難：「除因疫情影響，演出延期，我哋入台嗰日又掛8號風球，但大家都堅持綵排唔肯走。演出前我其中一位拍檔又『中招』，rundown又要修改，我有一首歌要cut走，最後修改咗同梓軒有共舞環節，男人浪漫喇！」全晚都以英文歌演出，只有一個環節是他與梓軒選唱了張學友的經典金曲《怎麼捨得你》和《愛是永恆》。
對於家燕姐稱讚有Rap絕技，梓軒坦言演出是有壓力：「技巧上真係好難，好彩條脷冇打click，嗰5分鐘要背嘅歌詞，加埋差唔多係全晚歌曲咁長，兩日前我仲背緊。」梓軒與Crisel演出很有默契，他搞笑說：「台上冇機關，但我最怕踩親Crisel啲靚裙，每一步都要好小心。」
