2024年樂壇充滿新鮮感，最亮眼的一位是Kiri T，今年首次嘗試以流行曲風創作《至少做一件離譜的事》，MV在YouTube的點擊率竟高達390萬次，從獨立歌手簽約唱片公司，Kiri T真正走到大眾眼前。
連樂壇天后容祖兒也出了一個IG post介紹她，Joey形容Kiri T是「有待發掘的寶石」，令人更加好奇Kiri T的背景。
29歲的Kiri T，本名謝曉盈，2015年曾以一曲《Twenty-Something》出道，其後到英國讀中學時，選修古典音樂課，並開始寫歌，14歲時為容祖兒《兩面》作曲，這是Kiri T的第一首的音樂作品。
擅長英文流行歌曲的Kiri T，今次推出三首廣東歌《至少做一件離譜的事》、《有些話要用英文說》、《傷心的時候別說話》；《至少做一件離譜的事》更登上叱咤903冠軍歌，MV在YouTube的點擊率更高達390萬次，連台灣天后魏如萱都翻唱。
Kiri T說︰「魏如萱好叻，因為我之後去咗台灣拍嘢，我同佢見面傾偈，我完全唔使講國語㗎，佢完全係understand廣東話，佢對廣東歌同埋廣東話呢個language好有passion，甚至多過好多我認識嘅香港人，包括我自己，見到佢好inspire到我，係咪要再remind返自己廣東話呢個culture呢？其實好多嘢值得我哋去發掘，值得去continue。」Kiri T與魏如萱的認識是源於《惡女》這首歌，「我以前都有聽佢嘅歌，好多年前我幫佢編過曲，但只係電子部分，首歌叫做《惡女》，嗰時producer係Alex Fung，當時我已經好鍾意佢把聲，但只係我單方面認識佢嘅音樂，之後喺IG翻唱《至少做一件離譜的事》，我喺story見到，好驚喜！」
戴頭盔拍MV慳返妝頭
Kiri T透露，《至少做一件離譜的事》最終錄了三個版本，「真係冇諗過首歌會爆，因為同我以前嘅歌完全唔同風格，啱啱錄呢隻歌嘅時候，我同co-producer試咗好多唔同version，我形容編曲係幫首歌襯衫，我記得臨出之前一個月，都仲未決定用邊個版本，大家都十五十六，不過擺喺度大家都唔會知個答案，咁就出咗依家大家聽到嘅版本。」
《至少做一件離譜的事》的MV，Kiri T戴上太空頭盔在貨車上彈琴，亦成為樂迷的討論，她解釋︰「我一直都好想拍一個有太空theme嘅music video，因為我覺得最離譜嘅事係可以喺太空種到一棵花，或者一個有生命嘅植物，一直都對太空好有情意結，公司同事傾完之後就話，我哋係唔會有CG做到你喺太空種花，但可以讓步著太空人服飾，哈哈！其實意外地慳咗妝頭，因為都見唔到個樣，因為最尾冇得種花，但我都想有個慢慢地好magical嘅growth，所以我哋就揀咗日出嘅magic hour，慢慢由黑變到去有陽光。」
何韻詩回覆以為騙案
14歲時，Kiri T已能夠為容祖兒作曲，「其實嗰陣時係撞彩，咁啱屋企換電腦，同埋開始嗰啲school project，同學開始要有Laptop，我就揀咗MacBook，我就開始接觸音樂軟件，覺得好好玩，好似打機咁，嘗試錄咗啲歌，之後就send出去，我記得好似send咗兩三間music publishing，其中一間係人山人海，阿菇(何韻詩)就揀咗個demo，回覆咗email俾我，我初頭以為係auto-reply，係咪玩我㗎？好搞笑，直到佢再問我仲有冇歌？問我個音樂background，之後就有見面，嗰時仲讀緊中學，又冇work experience，所以就要見埋我媽咪，嗰一隻demo係我第一隻send俾佢嘅，後來就變咗容祖兒嘅《兩面》。」
直至2022年，Kiri T正式簽約香港華納唱片，推出首支粵語單曲《扭擰雪糕屋》，亦為同門師兄MC張天賦編曲、和音規劃及後製《世一》。
出道六年，Kiri T將於10月19日舉行首個個人音樂會，門票開賣當日火速售罄，如今一身飛債，她希望能夠開part 2，「呢個係我第一個有live audience嘅show，所以其實所有嘅準備，都未試過嘅嘢，所以都好特別，我最想俾認識我嘅觀眾，知道我一直以來做音樂嘅過程，同埋音樂對我嚟講嘅意義，更加了解Kiri T。」
髮型︰@JamieLeeHair、@hola.hair.pets
化妝︰Tammy Au @tammyau_makeup
服裝︰Alice and Olivia