現年40歲的關楚耀去年5月20日宣布向網紅女友Joann求婚成功，直到11月Kelvin在IG報喜，宣布已婚消息並留言：「Officially Mr & Mrs Kwan.」
原來關楚耀於11月18日簽紙結婚，但一直未舉辦婚禮，今次是Kelvin第一年做「人夫」，接受《明周》訪問時難掩興奮心情，他說︰「第一年派利市，我同老婆都好開心，準備咗五位數派利市，身邊朋友個個都好雀躍，希望大家手下留情，哈哈！總之大家開開心心，見到就派！」不過，有一封利市Kelvin就話一定是會最大封，「就係細妹個B，睇住佢大，而家九個月大喇，最期待派俾呢封利市。個個都問我追唔追龍B，講真，我哋就想過下二人世界先，不過追到都好㗎！仔女都冇所謂。」
問他婚禮有定案未？Kelvin說︰「已定了五月舉行，只邀請了家人和一些好友，地點在東南亞啦！」Kelvin去年在泰國旅行期間向女友求婚，估計他們會返回求婚之地泰國舉辦婚禮。
而渡蜜月，Kelvin和Joann早前一同去了日本大阪，兩夫妻去了位在大阪府箕面市的勝尾寺，勝尾寺以祈求學業合格與勝利聞名，有大大小小勝運達磨不倒翁，吸引不少人前往祈福及打卡。
Joann在IG po出在達摩牆前的打卡照，她十分推介大家來勝尾寺，「今次自駕遊就係為咗勝尾寺，距離市區真的太遠了，但值得來。呢個寺廟同東京貓貓寺（東京豪德寺）唔同，勝尾寺超大！我哋16:30先去到，17:00閂門了。」Joann又教大家如何用達摩許願，「原來本來的達摩不倒翁眼睛是空白的，想好願望和目標和自己名可以寫係達摩背面，給他畫上左眼，願望成真後，幫佢畫埋右眼。」Joann又提醒大家願望達成之後要帶達摩返勝尾寺。