Dear Jane對觀塘這個地方十分有感情，因為他們的band房一直都在觀塘，那些年「觀濱」（觀塘海濱公園）還未出現，觀塘也成就了他們的愛情三部曲《哪裏只得我共你》、《只知感覺失了蹤》和《經過一些秋與冬》，今年更落實推出延續篇，由袁澧林和胡卓希再次出演MV，延續「陳浩然」與「高小曼」的愛情故事。
成軍二十年，四子坦言從未鬧過交，由得二百人買飛的細場，唱到上紅館，連啟德都踩場了，一直都並肩而行，「呢個旅程無論任何情況，都係我哋四個人一齊行！」
不經不覺成軍二十年的Dear Jane，四位成員主音黃天翱（Tim）、結他手翁厚樑（Howie）、低音結他手伍漢邦（Jackal）和鼓手黎俊華（Nice），原本完全沒有概念，是早前受訪時被問到，如何慶祝二十周年？他們才突然醒覺，才立即啟動「DearJane20周年」企劃。
唱片公司馬上為他們入紙申請紅館，Dear Jane將於五月，第三度踏上紅館舞台。Tim說：「演唱會主題係《Dearest》，即係一封信嘅上款，決定開騷坐埋傾嘅時候，大家諗嘅title都係同信有關，希望樂迷入場聽住我哋啲歌，就好似打開封信，朋友send俾你嘅信又好、Dear Jane俾大家嘅回信又好，想大家重拾返聽嗰首歌時候嘅moment。」
第一次音樂會慘痛經歷
「Dear Jane」的隊名，源自「Dear John letter」的男子版（意思在一段男女關係中，女方寄給男方的絕情信）；二十年後，這隊男孩樂隊已長大，希望在演唱會上向多年歌迷以歌「回信」。
Dear Jane四子正為rundown頭痛，要把二十年來推出的歌曲取捨，Tim說：「其實都砌咗一個幾rough嘅rundown，發覺係唔夠位㗎，所以我哋有諗緊另一個plan，依家有四晚啦，可能每晚都有一part唔同歌單，咁就應該可以唱多幾隻！」今次Dear Jane選擇了三面舞台，除了想用更多visual效果外，更會與弦樂團合作，希望為樂迷帶來新鮮感。
唱過大大小小無數live show，Dear Jane仍然記得第一次售票音樂會的慘痛經歷，「喺西灣河蒲吧（協青社蒲吧），係我哋第一次賣飛騷，嗰次都深刻，開賣兩個禮拜，賣得七張飛咋，到最後要封一半場，本身嗰度係個籃球場，惟有中間擺個幕間一間，開一邊場，嗰陣六百人都捱唔到，最後得兩百幾人咋，但我哋又冇嘢嘅，仲好落力演出，覺得要對得住入場嘅每一位觀眾，我仲記得個騷都個半鐘，唱二十首歌㗎！」
由蒲吧唱到紅館，今年一月更參與《FOUR in LOVE萬人CHARITY LIVE》，率先踏上可容納五萬人的啟德體育園，Tim說：「個場真係好大，我好記得唱緊《2084》，諗住去另一邊啲觀眾打招呼，行過去足足用咗半首歌時間，樓底又高、舞台又大，其實係幾正嘅！我覺得樂隊有生之年都希望有機會喺嗰度開show，都算係一個里程碑嘛！」Howie又表示，希望香港除了有大場館陸續出現外，亦希望有一些高質小場地，可以讓新樂隊有開騷機會，「配套同大場可以一樣，只不過人數少啲，俾大家可以多啲機會去開騷，我哋又可以同歌迷去玩返晚，我希望未來可以多啲五百至八百人嘅Live house。」
三部曲陪住樂迷成長
二十周年企劃的頭炮，是即將推出的新歌《你流淚所以我流淚》，這首歌將延續一六年的愛情三部曲：《哪裡只得我共你》、《只知感覺失了蹤》與《經過一些秋與冬》，而MV更會找來袁澧林（Angela）和胡卓希（Jason）再次擔演男女主角，延續「高小曼」和「陳浩然」的愛情故事，「呢首歌出現都係緣份，新歌都係由陳詠謙填詞，同一時間大家都度緊個MV點拍，原來大家都想將三部曲個故事延續，公司即刻問Jason和Angela，咁啱又夾到個期，所以就促成件事，三部曲其實都陪住咗好多唔同嘅樂迷成長，MV入面個故事，時隔九年，又會變成點呢？」
上回講到二人的愛情已經結束，偶爾在社交平台收到提示，還是會想起對方，而小曼身邊已經有另一個「他」，延續篇的發展會如何呢？Tim率先透露了些少：「係一個open ending，佢哋會再相遇，咁多年來，二人都有唔同經歷，浩然一直以為自己已經放低咗，其實從來都冇，其實一路喺度留意住你，關心緊你。」
Dear Jane的band房在觀塘多年，他們可以說是在觀塘大，而三部曲的MV亦都是在觀塘取景拍攝。新MV中，大家更可看到這些年來觀塘的變化，Nice說：「返到九年前的一些場景拍攝，好得意，浩然嗰個木工場仲喺度，已經相隔九年又有疫情，呢啲地方隨時會冇咗，或者執咗，但嗰度竟然冇變過，所有擺設裝飾係一樣！」Tim卻有點感觸，「都有拍返觀塘唔同嘅地方，有啲地標已經冇咗喇，例如裕民坊，但係有啲嗰陣時係未有嘅嘢，就好似『觀濱』（觀塘海濱公園），哈哈，所以大家睇到兩位主角成長外，亦可以睇到整個觀塘，變咗啲乜嘢？」
一齊捱嘅人先最緊要
問Dear Jane，如何形容這二十年的旅程？「覺得好豐富好精采，係我哋四個人嘅一個旅程，感覺好似喺一隻船，可能撐到咁上下時候，上咗岸轉架車，但都係我哋四個人，而呢個旅程愈來愈多人加入，有公司嘅同事啦，有新認識嘅朋友和樂迷，呢個旅程無論任何情況，都係我哋四個人一齊行，而Dear Jane最核心嗰樣嘢，就係一開始就係想唱自己寫嘅歌、開騷夾band，到依家都係一樣，無論大場地、細場地都好，我哋都係堅守住呢一個諗法。」今年Dear Jane「冧莊」奪得「叱咤樂壇組合金獎」，剛好二十周年，可謂別具意義。
夾band夾了二十年，問四子有甚麼相處之道？他們直言從未真正鬧過交，「我哋四個性格都好唔同，不過大家都係好簡單，就係好熱愛、好專心擺晒心機落去樂隊，最重要係尊重，所有可以鬧交嘅嘢，例如今日做唔做呢樣嘢、著唔著呢件衫、做唔做呢首歌，呢啲一切都唔及對方感受重要。」Howie續說：「我哋都好明白，身邊同你一齊捱，一齊經歷緊同一樣嘢嘅人，先係最緊要！如果大家一致，任何事就會識得作出選擇，每次都係先討論後協議，唔會去到鬧交個位，依家就連討論都愈來愈少，大家都好明白大家！」
大家信念一致，Dear Jane亦在同一間唱片已經十四年，他們都感到驚訝，「係喎！咁就十四年，約都續過兩次，大家work開真係OK，同埋一隊樂隊嚟講，如果要轉一個新環境，又要重新去同新公司磨合，呢個都會比較辛苦！大家合作咁耐，知道晒大家個frequency（頻率），所以，係囉，if it ain’t broke，don’t fix it！」不破就不修，大家一齊走更多個二十年！
髮型：Issac Lo@HOLA il colpo Hair & Pets
化妝：German Cheung