男藝人玩健身練大隻已經係一種潮流，而最近呢股熱潮仲影響埋一眾女藝人。日前女藝人王君馨（Grace）喺社交網上傳咗好幾張健身相大曬結實腹肌，Grace睇見自己努力健身有少少成果，都忍唔住留言讚一讚自己有堅持：「羅馬不是一天建成的。」
從照片可見，Grace除咗操到有腹肌，老鼠仔都有番咁上下，完全見唔到拜拜肉。當佢擺出標準「大隻佬」甫士嘅時候，各位就算摸唔到都應該感受得到Grace嘅肌肉有幾結實，絕對是力的表現。講開有講，王君馨2016年為飾演《城寨英雄》花曼一角曾進行玩命式減肥，佢當時唔單止節食，仲用埋腰封配合，最後條腰減到得番20.5吋，所以話超S身型絕對唔係話有就有，背後要落幾多苦功只有當時人先知。
延伸閱讀：【肥仔潛力股】陳奐仁狂做Gym變爆肌男：我都認唔到自己
除咗王君馨有密密健身之外，視后田蕊妮都有趕上呢個潮流，睇相就知佢而家勁fit，個造型仲有少少似花曼添。最後，各位讀者睇完王君馨嘅相都可能變心心眼，但其實都唔洗太羨慕，學阿Grace話齋羅馬都唔係一天建成，只要願意持之以恒咁操練，總有一日你都可以好似王君馨或者陳奐仁一樣咁fit！
圖片來源：王君馨@Facebook