日本乒壇美少女石川佳純，上星期出發去卡塔爾參加國際乒聯巡迴賽，新冠肺炎在日本疫情嚴重，當日媒體到機場送機，與球員要保持三米的距離不能埋身，所有代表隊都戴上口罩，不過有記者發現一姐石川佳純冇戴口罩，一問之下佢話屋企的口罩送咗俾香港的隊友，因為對方比她更需要；消息傳出後，石川的中國球迷心痛不已，即刻寄咗100個口罩俾佢經理人轉交，石川返到日本已經有口罩戴，佢多謝球迷之並表示會好好防護。
究竟邊個香港隊友獲美少女贈口罩呢？原來就係香港乒球一姐杜凱琹，記者致電凱琹了解情況，佢話二月開始已經去日本打聯賽，當時香港一罩難求，以為去到日本再買都未遲，點知去到日本當地藥籹店的口罩已被掃清，「我同石川佳純同一間俱樂部，當時問佢邊度有得賣口罩，佢叫我唔使擔心，之後去比賽的山口縣係佢鄉下，應該有口罩賣，不過去到忙比賽又冇時間去買，佢知道我冇口罩就送咗三包俾我，佢對人好好，平時不時會送小禮物俾我。」
石川佳純贈罩善舉獲球迷大讚人靚心更美，杜凱琹話石川都有同佢講呢件事，估唔到媒體及球迷反應更大。二十七歲的石川是日本乒乓球一姐，父母都是乒乓球運動員，媽咪石川久美更是前國家隊代表，小學一年班已經開始打乒乓球，曾代表日本出戰里約奧運，兩年前被任命為日本女子乒乓球隊的隊長。
部分圖片來源：石川佳純@微博