王祖藍處男執導嘅賀歲歌舞電影《你咪理，我愛你！》將於月底上映。早前曝光的電影劇照已大爆蝦頭楊詩敏同阿Bob林盛斌會有牀上戲演出，但原來唔單只蝦頭為熒幕獻出第一次，連出名形象百變嘅Sammi（鄭秀文）都放低偶像包袱扮演「亂髮饑渴師奶」，而且仲話會有性感演出，真係未正式上畫都夠晒話題。
Sammi同梁祖堯喺戲中飾演一對為子女工作得疲於奔命嘅夫妻，所以多年來一直缺乏性生活。為了令老公對自己重新提起興趣，Sammi戴上了金色假髮，穿上貼身皮衣為老公製造驚喜。但係當二人埋身翻雲覆雨之際，囡囡竟然「搞破壞」，仲唔識趣咁問媽咪點解會著成咁，被撞破房事嘅Sammi同梁祖堯顯得尷尬又好笑。
Sammi是次客串演出真係落足心機，據知她單是挑選假髮也花了數天時間，每次拍完親密場面仲會即時走去導演身邊睇playback，務求做到一百分。而導演王祖藍事後接受訪問時笑住話Sammi牀戲拍攝過程激烈到「一波N折」，仲拍到連張牀都塌埋。想知Sammi同祖堯嘅牀戲有幾激烈？1月31日購票入場自有分曉。