鍾欣潼（阿嬌）在社交網站大曬閃爆鑽戒宣布婚訊，唔少粉絲、好友收到消息後都紛紛送上祝福，除咗當事人同雙方家長，感受最深切、激動嘅一定係陪伴佢十多年嘅好姊妹蔡卓妍（阿Sa）。
上一輩成日話：「而家啲後生仔只可以共富貴唔可以共患難，大難臨頭仲會各自飛。」呢一句說話似乎應用唔到係阿Sa同阿嬌呢對金蘭好姊妹身上啦。年過二十嘅讀者都知道陳冠希淫照事件已經轉眼十周年，阿嬌亦不幸成為閃卡事件女主角之一。
當年阿嬌開埋記者招待會交代事件，而坐係佢身邊就正正係阿Sa，作為一個組合開記招一齊出現好合理，但以個人名義開記招交代事件，阿Sa其實唔係必定要出席。咁點解阿Sa當年會出現呢？理由好簡單，就係阿Sa真係視阿嬌為交心好友，想同佢一齊共渡難關。
淫照事件過後，阿嬌人氣一落千丈，商場騷、拍廣告等工作都緊急煞停，二人組合Twins也被迫暫時解體，剩下阿Sa一個單飛發展。而係阿嬌呢段咁難捱嘅時間，阿Sa不時會主動聯絡談天同佢捱過難關。直至事件影響力漸漸減少，阿Sa就拖住阿嬌出番嚟見大家，舊年仲舉行《Twins LOL世界巡迴演唱會》慶祝二人組合成立16周年。
阿Sa仲喺演唱會上面發表感性宣言：「阿嬌，我認識你17年！大家一起工作就16年，多謝你一路以來陪伴住我，我愛你。」阿嬌聽到拍檔的感性宣言亦說︰「其實你改變了我很多，由我不喜歡彩色，只喜歡黑白變到整個人生愈來愈有色彩，愈來愈開心！由以前不喜歡說話，變到愈來化多說話，又常常笑，說真的，我真的很愛你，很愛。」
另一方面，阿嬌亦沒有待薄阿Sa呢位好姊妹，甚少拍電影嘅佢願意為阿Sa主演電影《原諒他77次》、《超級經理人》進行客串演出，呢種姊妹情實屬難得。
最後，筆者深信兩位一早已在17年前「對的時間遇到對的人」，因為唔少情侶拍拖面對七年之癢都分手收場，呢對好姊妹咁多年嚟都Keep住一直相愛，實在打風都打唔甩呀。而阿Sa一句「千言萬語在心中」相信亦係對阿嬌結婚最真切嘅祝福，如果你身邊都有一個好似阿sa或者阿嬌嘅好朋友，一定要好好愛護佢啦，事關這種友情真的得來不易。
文／一支蘭州
圖／互聯網