譚俊彥繼主演《天命》後，接住就喺《特技人》擔正做主角。《特技人》內容講述特技人喺鏡頭背後工作嘅故事，而劇中飾演「巔峰特技隊」頭目嘅譚俊彥就會帶住一班手下拍攝各類型動作場面。除咗武打戲之外，仲有爆破、飛車等動作場面，相信畫面一定好震撼！
譚俊彥接愛媒體訪問時透露，原來佢拍攝一場揸車衝落山嘅驚險場面時，曾經被玻璃割傷手掌，要入醫院縫廿幾針。當時其實有替身同特技人Standby，但佢仍然堅持親身演出，唔要替身。因為佢相信如果飾演特技人，無一場自己親身做特技，就唔稱得上係特技人啦，果然拍得夠晒投入！
譚俊彥拍攝嘅時候入哂戲，當架車碌緊落去，佢潛意識想泊定架車，於是將手擺喺啲玻璃度，點知成隻手掌被玻璃割傷流哂血。意外發生後，譚俊彥無即刻入院，反而應劇組要求，重新補拍多一次後至入院治療，最終傷口縫左20幾針。而譚俊彥並無因傷停工，第二日仲如常拍攝。
譚俊彥事後仲話：「只係傷手咁小事，又唔係骨折，縫咗針、食咗止痛藥，戴返個手套咪繼續開工囉！」難怪監製王偉仁都大讚佢做任何事都搏到盡！其實拍呢部劇造成大大小小嘅傷多到數唔哂，但譚俊彥都堅持自己親身拍攝，可以話搵命博，飛車鏡頭幾乎全部都親身上陣，係名乎其實嘅「特技人」，真係令人佩服！
圖片來源： my TV SUPER(www.mytvsuper.com)