【復活節】溫碧霞一家三口遊大澳 「振興吓旅遊業」

溫碧霞（Irene）遵守政府推出的「限聚令」，暫時停工14日，取消所有大型工作及聚會。老公Kenny怕Irene及囝囝Xavier在家生悶，昨日（12日）趁復活節假期為家人製造驚喜，偷偷地計劃了三日兩夜的大澳幸福之旅，Kenny在大澳訂了兩晚酒店，再帶他們四處觀光坐船仔遊覽大澳，品嚐大澳地道美食，又購買大量當地居民及漁民自製的漁產品、手工藝品作手信。

Irene直言是第一次到大澳遊玩，「之前一直未去過大澳，我好鍾意呢度，好似我以前童年時的地方調景嶺，有山有水有人情味，好多回憶返曬嚟，真係好開心啊。」她表示此行全由老公安排，「本來Kenny諗住帶我哋嚟大澳靜靜地行吓山、食吓嘢，又可以振興吓大澳旅遊業，點知嚟到原來都有好多遊客，不過大家都好自律，冇見過超過四個人的聚集。」

Irene同Kenny在市集買了好多手信，「好多店舖都話呢個疫情影響好大，生意好差，所以我哋特登幫襯小店食嘢又買嘢，希望大家都可以捱過呢個疫情。」Irene最開心這兩日天氣都非常舒服，清爽又藍天無雲，他們並計劃行山，度過健康又有意義的假期。