扮型惹的禍！英國歌手Robbie Williams，香港時間噚晚喺俄羅斯舉行嘅世界盃開幕禮擔任演唱嘉賓，唱唱下歌又扮型發揮壞孩子本色對住鏡頭豎起中指，全球睇緊直播嘅觀眾都硬食佢呢下粗口手勢，隨即遭網民喪鬧，連佢啲英國同鄉都唔撐佢，話佢簡直令英國人蒙羞，仲連累做直播嘅霍士電視台事後要公開道歉。
Robbie還與俄羅斯女高音Aida Garifullina一起表演。
Robbie喺世界盃開幕禮上順序唱《Let Me Entertain You》、《Angels》同《Rock DJ》等代表名曲，炒熱現場氣氛，當佢唱《Rock DJ》時，突然向拍攝鏡頭豎起左手中指，電視台當然無法即時將呢個突如其來嘅舉動「打格仔」，全球喺電視機前睇直播嘅觀眾都睇到Robbie做了這個不文手勢。
現年44歲嘅Robbie昔日係樂壇壞孩子，所以行徑出位絕不出奇，不過，佢喺全球矚目嘅大型體壇活動上咁玩法，就惹來網民喪鬧，單是英國《每日郵報》網上嘅報道就惹來網民一面倒咁鬧爆，有網民甚至留言話：「Robbie簡直令英國人蒙羞。」
有指俄羅斯叛諜斯克里帕爾（Sergei Skripal）父女今年3月喺英國遭神經毒劑襲擊，導致英俄兩國交惡，Robbie喺俄羅斯世界盃開幕禮上公然舉中指，可能會令兩地關係更為緊張。
另一方面，俄國喺2014年起禁止公眾表演中使用粗言穢語，總統普京今年5月已簽署相關立法，任何人喺公眾場合使用粗言穢語，可被罰款2,500盧布（約310港元），違例企業嘅罰款則高達5萬盧布（約6,270港元），所以Robbie有可能觸及當地法例，雖然未知佢會唔會遭起訴，但已連累做直播嘅霍士電視台事後要公開道歉。
撰文：安東尼奧
圖片來源：法新仕、互聯網