一年容易又書展，今日書展正式開鑼喇，寫真集爭妍鬥麗係每年必定上演嘅環節，女藝人同模名正言順將最靚、性感一面出書呈現！不過寫真集今年唔再係女性嘅專利，事關今年有袁偉豪出書，硬撼性感寫真！
今年適逢袁偉豪入行20周年，出書對佢黎講別具意義。佢自己同女友張寶兒都有喺IG同Facebook賣力宣傳，而袁偉豪更會喺21號（星期六）踩入書展，為自己作品舉行簽書會，又會快閃現身出版社攤位同粉絲零距離接觸，為銷量真係搏到盡！其實佢個人影集《Benontheroad》都落足本，之前就專程飛去印尼峇里取景拍攝，呢本書入面除咗有型人靚相，更圖文並茂咁表達自己喺人生旅途上嘅感受、想法同各種領悟，相當感性，實屬粉絲必買之作。
講開又講，其實香港書展自2008年就開始有寫真集推出，當中最有火花一定係性感女神周秀娜、Angelababy、邦民女Kama三人鬥得最激烈，當年佢哋寫真集簽名會真係迫爆會場。演變到2015年，陸續開始出現袁嘉敏、孫慧雪、樂瞳等熟女寫真集，而最令人震驚嘅係連過50歲嘅美魔女羅霖同溫碧霞都齊齊出性感寫真大賣，證明性感寫真不論年齡都一直咁有市場！
最後，雖然袁偉豪今年非常強勢，但其實佢仍然面對唔少寫真強敵，例如劉佩玥、楊思琦、簡幗儀、Rose Ma、松岡李那、沙律等等，唔知今年邊位銷量最多呢？
圖片來源：互聯網、袁偉豪、劉佩玥、楊思琦、簡幗儀、Rose Ma、松岡李那、沙律@Instagram