由兩大「視帝」黎耀祥（祥仔）、陳豪及龔嘉欣、李佳芯領銜主演的無綫熱播劇《殺手》，自開播以來贏盡收視口碑，其中飾演「閻武」的祥仔，與「Dark Angel」龔嘉欣更有不少埋身肉搏戲分，二人每次交手總是難分難解。早前龔嘉欣更向祥仔「挑機」，參與競技射擊運動，大鬥槍法，實行由戲內鬥到戲外！
祥仔與龔嘉欣透過三個回合作比併，鬥眼界、鬥速度及鬥專注力，首個回合，祥仔與龔嘉欣先要互射對方肖像測試眼界，在比試之前，祥仔盡顯紳士風度，他表示：「嘉欣，你想我開槍打你邊度？」嘉欣聞言即答道：「打我最大嘅地方⋯⋯我對眼。」不過，祥仔似乎眼界麻麻，未有打中嘉欣的指定目標，相反龔嘉欣卻「Dark Angel」上身，槍槍打中祥仔肖像要害，完勝首回合。
之後二人要鬥快上彈開槍射靶，在劇中曾是頂級殺手的祥仔，身手、速度當然有番咁上下，輕鬆力壓龔嘉欣勝出，扳回一局。到決勝回合，祥仔與龔嘉欣要鬥快跑到槍前換彈夾再射擊目標，雖然祥仔由跑到換彈夾均一直領先，但卻遭龔嘉欣後來居上爆冷勝出；祥仔最終須接受大懲罰，當成龔嘉欣的活靶任射唔嬲。
事後，祥仔與龔嘉欣透露首次參與競技射擊運動，大讚刺激、好玩，祥仔笑言：「見啲靶被打到瞓低晒，感覺到同靶之間有交流，所以玩呢個活動好有滿足感，加上揸起槍好有型，自己從來未試過咁有型。」至於爆冷獲勝的龔嘉欣自言有遠視，她說：「沒有想過會贏，平時掟飛鏢都唔會掟中個靶，以為玩競技射擊運動對女仔會難啲，但原來一啲都唔難。」