梁朝偉離開王家衛嘅澤東公司後，今晚第一次出席公開場合，為新片《歐洲攻略》嘅首映做勢；問到偉仔現在找了老婆劉嘉玲暫做經理人，會唔會有好多人向佢招手，想做佢真正經理人？偉仔話：「唔知多唔多喎！好多嘢要隨緣，緣份到咪開始，依家嘉玲頂住先啦！反正我都唔係幾做嘢。」
偉仔話最近休息咗幾個月，主要工作係玩，玩吓帆船呀！滑水呀！最近仲開始咗學彈琴添，「之前，拍戲時要拍一幕彈琴戲，學咗啲，拍完後又覺得彈琴幾正，就繼續學，喺屋企彈俾自己聽。」問佢有乜新工作？佢話明年一月會拍《捉妖記3》，其餘時間繼續玩，「我覺得拍了三十幾年戲，好多時冇時間陪伴屋企人，依家有條件有能力，應該多些陪家人。」問佢有冇叫嘉玲陪？「佢好忙㗎！佢咁鍾意做嘢，我求佢陪我去睇紅葉，佢話好啦！攞一個星期假啦！」偉仔話自己做嘢時好大壓力，有次睇牙醫，醫生檢查完話佢有磨牙，「醫生整咗個牙套俾我戴，拍完戲再睇牙醫，冇咗磨牙習慣，所以都係休息好，真係遇到有好劇本，真係好想拍才做啦！」
至於今次拍《歐洲攻略》，偉仔話今次同導演馬楚成合作，已經相隔十八年，拍完《東京攻略》同《韓城攻略》後，本來想拍落去，不過大家想拍第三部嘅話，想喺劇本上，演員上更加好，所以先等咁耐才開拍《歐洲攻略》，大家今次一起再合作，一樣咁開心，依然好親切，女主角唐嫣就話電影去到歐洲，拍戲之餘仲可以購物，主持問到唐嫣跟電眼梁朝偉合作，有冇被十萬伏特電暈？皆因同偉仔合作過嘅演員，人人都會暈喎！唐嫣當然話自己都唔例外啦！
而一向好少自拍嘅偉仔，早前上載咗一張笑得好開心嘅自拍照上網，立即引來過萬個留言，偉仔話自己好少留意網上嘅留言，放嗰張相係因為去年九月去到米蘭拍外景，喺火車站拍番張嚟留念下，自己第一日開工咁啫！
